PARADISE KHAWL MUN NUAM KA VA PAI PAK NA (Sia Kam Hau)

Thumasa

Kei pen 1975 kum June kha (15) ni, nitak nai 7:00 hun in Gupkhait na sang in Pasian tapa ka hih lam kitel in Pasian hong lampih na tawh in 1979 kum ciangin Khasiangtho baptize na ka ngah aa, kamtuam tawh Pasian hehpih na zong ka phat thei ta hi.

1983 kum ciangin Pasian naseem ding in khensat in ka hih theih bangin Pasian nasem dingin hun kangah bang bang sem in ka kipan hi. 1985 Kum ciangin a hun bit in Pasian nasem aa, Pasian in zong thupha hong pia in hong lamlah nate sungah 1987 kum July kha (31) ni, nitak nai

3:30 hun in Pasian in a Vantung mite hong sawlin Vantung gam hong muh sakna thu sanggam u leh nau te tungah Pasian hong sawl na leh Pasian deih na om bangin tetci ka pang hi. Hih tetci pan na thu a sim kha mi kheempeuh Pasian in thupha hong pia ta hen.
 
Tetti panh na-
 
Jeremiah 33:3 Kei nong sap leh kong dawngkik ding aa, na theih ngei nai loh a ki - iim cipthu lianpi te kong gen ding hi."
 
Hih Laisiangtho kammal pen Pasian in Rhema hong piak kammal a hih man in hih tung tawn in Pasian in a thu sim te hong lak hi. Pasian pen a beisa tu laitak, mai lam hun, kheempeuh Ama khut sungah om aa, Pasian in a pat pan a tawp dong na a geel Pasian ahih man in a thu sim hong lak te hangin Pasian hehpih na ka phat hi. July kha (31) ni, nitak nai3:30 hun in Topa Vantung mite 2 in hong laa in Vantung khawl mun nuamah hong paipih uh hi.
 
Vantung ka tun' ciangin a nop daan pen, mihing ii ngaihsut na in baan zo lo zah in nuam hi. Tua sungah a tung sa gupna ngah mite ahih zongin, Vantung mite ahih zongin, Pasian min phat ziah ziah in tua takah kei zong khat in ka va kihel hi. Tua laitak in, Vantung mi 2 in hong paipih khia in tha khat thu mah in Vanthak leh Leithak hong tun' pih uh hi. Vanthak leh Leithak ka tun' uh ciangin ka khua daak leh mipeuh mah khat zong ki mu lo-in, kuamah zong tung nai lo hi. Tua munah Vantung mite tawh kham lampi tawn in ka pai khawm uh hi. Kham lampi pen bangzah dongin siangtho hiam cih leh, ih liim khawng ki mu in, te ziahziah in Vantung mite tawh ka paikhawm laitak un, Vantung miten" Hua mun aa khuapi siangtho na mu hiam" cih-in hong dong hi. Kei zong ka et leh Jerusalem khuapi thak ka mu hi. Tuno vaang taan na a lim khawng ka mu aa, nop ci mah mah in hih ih leitung ngaihsut na tawh kigen khia khin thei lo hi. Tua mun pan in, hong paipih Vantung mite 2 in hong paipih khia aa, Hell khuk lam a zuan  khaa te pai na lampi gei ah hong tu sak hi.Tua khaa te bang zah dongin hehpih huai hiam cih leh, kapkawm aa, hagawi sa in, a kisawn lah hi lo, a ki kaai lah hi lo,Hell khua lamah pai-in Hell ah kia ziah ziah uh hi. Tuate pen bangzah dongin heh pih huai hiam cih pen, mii ngaihsut na in baan zo lo hi. Leitungah ih iit mah mah ih nu pen, ei muh na  ah mi gilo te'n hong matsak in khau tawh hong hencip sak in ei muh na  ah hong bawlsia in, tem khawng tawh hong dawt gawp leh a thuak zo aa, khi tui luang lo aa,  a om zo leitung ah khat zong om lo dingin ka um hi. Tua saang a zah tampi in Hell lam zuan te hehpih huai zaw hi. Tua munah mikim in mu thei hi leh, ei hong bawlsia pen te leh hong mudah pen te nangawn a hehpih lo ding kuamah om lo ding hi. Tua mun panin, Vantung mite 2 in hong pai khiat pih leu leu in, Vantung Paradise khawl mun nuam ah ka tung kik uh hi. Vantung gam ii om zia pen Pasian vaang a taang zei zai pi sungah misiangtho te ki om zih ziah hi. Vantung a ki silh puan tepen a taang zeezaa, a leng dialdial puante ki silhhi. A tua puan te pen va lawng leng, puan kilawng kha lo-in, pumpi ki lawng kha hi. Pumpi ki lawn khak hangin pumguak tang aa om ahih na kimu lo hi.Tua pen Eden huan aa,
Adam leh Eve in mawhna a bawl ma aa, a silh uh puante hi dingin ka um hi. Vantung a ki silh puan pen tuuno puan hi.   Praise the Lord.
 
Vantung aa a tung sa Gupna ngah mite khaa pumpi pen dah maai, heh maai, cih bang om lo-in maai tai thei mah mah uh hi. Vantung a pumpi pen a neu a lian om lo-in, mi kheempeuh kikim mang hi. Meel zong ki bang mai-in hoih thei mah mah hi. Tua laitak in Pasian in leitung hong en sak in, hih ih om na leitung ka et suk leh, neuno khat bek pha in vom milmel hi. Tua a vom milmel sung ah a taang lit let pawl khat om aa, " Topa aw, hua a taang litlet te bang hiam " ci a ka dot leh, " Hua na muh a taang litlet te pen, Zeisu Khazih honpa leh gumpa a saang aa, Zeisu sisan hang aa, mawh mai na a ngah Pasian tate hi. " hong ci hi. Tua ahih manin Pasian tate pen a man pha mahmah a hih lam ka phawk hi. Tua khit ciangin a taanglitlet pawl khat te ii lu tungah Aaksi taang omka mu hi. Topa aw, " Hua aaksi taangte a bang cite hiam " cih aa ka dot leh " Keima a dingin bawlsiat na a thuak ka nasem mite a hi zongin, a khuk zang aa, kha mang thang ta ding thungen te ahi zongin, a neihsa te tawh ka gam aa ding na sem mite tungah aaksitaang om hi. " hong ci hi. Tua laitak in Z.B.C Labu (218) sung aa " Tawldam na inn sungah ka khan lawh ciangin na, ka lu tung aaksi taang a om diam" , tua la pen kakam pan
hong ging khia hi. Ka sak khiat te, ka pumpi, a luang a lup na, lupna tung pan a la sa a hih ciang in, kakiim a om te pen, labu na leem khia in hong sak pih na hi tuak uh hi.
 
Tua ciangin ka et suk leu leu leh, pawl khat te vom milmel in om uh hi. Topa aw " hua vom milmel te kua hiam" cih ka dot leh
" Gup na ngah lo mite hi." hong ci hi. Tua ciangin kei zong na sa lua kahih manin " Topa aw, hua a vom milmel te aa ding zong Zeisu si khin ta a hih manin amau kiangah gupna thu gen dingin hong nungta sak in, hong khah kik in" ci-in thu ka ngen hi. Ka thunget na Pasian in hong dawng lo hi. Tua pan leitung ka et suk leuleu leh, gupna ngah sa te lak pan pawlkhat te a ih muu mang a om ka mu hi. Gupna ngah pawl khat te in, tawlnga lo in nasem in a om te zong ka mu hi. Gupna ngah a ih mu mite ka muh ciangin ka dah pih mah mah aa, tua laitak in Vantung mi khat in bang hong gen hiam cih leh, " Gupna ngah a ih mu mite pen a ngah ding uh thaman dawi mang pa'n
hazaa ahih manin, nasem sak lo-in khimmang hi." cih hong gen hi. Tua ahih manin, gupna ngah aa naseem lo mite  Vantung a tun' ciangun a zawng pen mite hi cih ka phawk hi. Hih te khit ciangin Pasian in leitung hong en sak leu leu aa, hih ih om na leitung ka et leh zaang kuam pi khat ka mu hi.Tua zaang kuampi sungah mi tuul tampi tak dingzei zai in om uh hi. Topa aw, " Hua a ding zeizai te kua a hiam " ci aa ka dot leh, Pasian nasem hi ung a ci kheempeuh hi" hong ci hi. Topa aw, " Leitung ah nang ma nasem te tampi tak om hi lo hiam", ka cih leh, " Ka nasem tam lo hi, bang hang hiam cih leh hua na muh miteng lakah, zah ah sawm li pen ka nasem ahih lam ka thei kha kei hi. Ka nasem aa kaciap teh pen za ah sawm guk bek om hi, sawmguk te lakah sawm li te in leitung thupha bek bek ngaihsun in kha mang thang vei nawn lo hi. Sawm nih bekin kha mang thang vei lai hi." hong ci hi. Tua ahih manin Pasian nasem te aa ding thu naak nget sak mah mah ding kul hi. Pasian ciaptehloh sawm li pen gupna ngah lo aa, Pasian nasem teng hi.Tua a hih manin, amau Pasian nasem hi ing a cih hang Pasian in  thei kha lo hi.Tua tak ciangin ken zong " Topa aw, nang ma na sem dingin hong khah in " ci-in a nih vei na thu ka  ngen hi. Pasian in hong phal lo ahih manin " Nang na pai kik sang in hi munah om suak le cin, nang aa ding in hoih zaw ding hi. nang ma  om loh hang ka nasem te om hi, ka nasem te a kizat thei kei leh zong, van tung mite sawl ding hing, Vantung mite a kizat thei kei leh zong, suangte ka kiko sakding hi" hong ci hi .Kei zong " Topa aw, Vantung mite sangin kei hong sawl
zaw in, Vantung mi pen gupna ngah mite hi lo ahih teh Vantung mite saang, kei ki man zaw ning, Suangtum pen, ngaihsut na nei lo, hi mawk a hih teh suangtum sangin kei hongzangh zaw in" ci-in thu kangen aa, thunget ka ngah kei hi.
 
Tua khit phet in ka muh na kheempeuh hong mial mangin, khut tawh maih thei zah dong dingin khua mial pi-in ka mai hong daal hi. Tua khit phet in thakhat thu in khuavak hong luut in khua mialpi hong kiheem khia in ka muh thei kheempeuh khua hong vaak hi. Mual mong panin thakhat thu-in ni hong suak aa, tua ni pen taang mah mah in hong nawh pai mah mah hi. Mual ah a tum dek tak pii 3 pawl dingin hong khawl hi. Kei zong " Topa aw hih thu 3 bang deih na hiam Topa aw" ci-in ka dong hi.
 
" Na muh masak khua mialpi pen Topa Zeisu leitungah a pai ma in, Pasian muh na ah leitung pen mial cip hi. Tua khit teh tua na muh khuavak pen Topa Zeisu hong suah khit ciangin Pasian muh na  ah Zeisu vangin leitung taang hi." hong ci hi. " Tua khit teh tua na muh ni taang pen Khasiangtho a kibuak ni a ki pan tu ni dong tua Khasiangtho ni pen pai pai-in mual ah a tum dek tak ni na muh bangin Khasiangtho ni zong a tum dektak hi ta hi. Hehpih na hun bei ding nai ta hi." hong ci hi. Tua khit ciangin kei zong " Topa aw, nangma nasem dingin hong pai kik sak in " ci-in thum vei na thu kangen hi.
 
Topa aw,. " Kha mang thang khat beek nang kiang tun' pih lo-in ka guak pai nuam kei hi. hun nai mah mah ta a hih leh na nasem dingin hong pai sak kik in" ka cih leh, ka thunget na ka ngah kei hi. Tua laitak in Vantung mite ka gei ah ding in, Pasian tawh ki mai ngat
in ka om lai takin, ka leitung pumpi gei ah a om thu-um mite in, hih pen kamtuam bek bek tawh thungen leng hoih ding hi. ci-in Rhema
ngah uh ahih manin, ka pumpi tungah khut nga in kamtuam bek bek tawh thu hong ngen uh hi. Tua kamtuam tawh thunget na  aw ging pen, Vantung dong ah hong ging to in, Pasian leh kei ki kal ah hong ging to to hi. Vantung mite'n thei lo, ken' zong bang deih na haim thei lo hi ing. A mal ki thei lo-in a ging ka za hi.Vantung mite in thei lo-in liing lel uh hi. Hih kamtuam thunget na  aw hong gin ciangin, Pasian in hong phal lo kim lai pen hong phal kikin, Vantung mite in hong puak kik in, ka pumpi sungah ka luut kik hi. Tua ciangin leitung ah a nungta kik ka hi hi. Tua  ahih manin hih kamtuam pau mal pen, Pasian in thei in  hih tung tawn in Pasian nasem ding in a nungta kik ka hi hi. Hih hun ( ka paikhiat leh ka tun' kik kikal ) nai 4 sung bang sawt dingin ka um hi. Tua hun sung a Pasian ii hong lah pawlkhat kong gen nuam hi. Ni khat ni ciang gupna ngah mi te thaman saan ding tawh kisai, a lim daan zong hong lak hi.  Bang ci bangin hong lak hiam cih leh, Kumpi Zeisu pen a vaangliat na tokhum tungah tu in Zeisu nung lamah Vantung mite ding zih ziah in om uh hi. Zeisu mai lamah gupna  ngah mi kheempeuh tu zih ziah im om uh ka mu hi. Tua lai takin Kumpi Zeisu thaman pia dingin, a vaangliat na kumpi tokhum pan hong ding khia to hi. Hong din'khit ciang thaman saang ding pa amin tawh hong sam khia in, a sap mi pa hong pai in, kumpi Zeisu gei hong tun' ciang, Zeisu vaangliat na phu zo lo a hih manin, Zeisu maiah hong tuuk suk in, Zeisu khe peek  tungah a lu hong nga suk in lung dam lua a hih manin hong kap khia hi. A khitui te zong Zeisu khe tungah taak hi. Kumpi Zeisu in, " Ka tapa aw kei ading in gen theih na haksat na, bawlsiat na thuak in na hun neih kheempeuh kei aa ding in zangh na hih manin
nangah ding thaman in vaangliat na lu khu hi",  a cih khit phet in Pa Pasian kiangpan vaangliat na lukhuhong kikhak sawn in, Vantung mite khat khit khat hong ki khaak deuh deuh in, Kumpi Zeisu khut tungah hong tung ta hi. Zeisu in tua vaangliat na lukhu tawi-in, ka tapa aw, hih vaangliat na lukhu na khuk na dingin tu ma hun khat lai-in ling lukhu ka na khu hi. Na ngah ding thaman sang dingin, hong tho to-in, ci-in Zeisu in sam hi. Thaman sang ding pa pen Zeisu vaangliatna phu khia zo lo a hih manin bok cip hi. Zeisu in a ngah ding thaman pen a khut langah tawi-in, a khut lang khat tawh thaman sang ding pa kaai to hi. Thaman sang ding pa  hong din khit ciangin Zeisu in a lu tungah vaangliat na lukhu hong khu sak hi. Tua lai takin Zeisu nung lamah a ding Vantung mi kheempeuh in a ging thei kheempeuh tum in, awng in, Pasian min phat in, thaman saang pa pahtawi ngeeingaai uh hi. Tua lai tak mah in Zeisu mai lamah a tu zih ziah gupna ngah mite zong, kuama sawl lo pi-in amau thu in kituak takin tha khatthu in hong ding to ngeei ngaai in, sisan manphatna la sa in, Hallelujah ci-in thaman saangpa pah tawi ngeeingaai uh hi. Hi bang daan aa thaman kipia pen,a saang lo taa dingin bang zah dong aa maimial uh hiam, bang zah dong aa zum uh hiam, cih pen ih mii ngaisut na in baan zo lo hi. A maute pen, a thaman ngah na dingin,
leitung ah nung ta kik in gupna thu, taza haw nuam mah mah uh hi. Tua hi aa, Vantung pan in, gupna thu gen a, leitung ah kipai nuam pha mah mah ih cih ciangpen, ei, hi tak aa, a nung ta te in, ih gen mah mah ding hi, ci-in ka phawk hi. Hi bang aa hong musak Topa in min than na ngah ta hen...
 
Pasian in hong khah kik in ka nungta kik aa,ni thum sung pau zo lo, taang zo lo-in ka om hi.Tua hun sungah Pasian in bang hong lak hiam cihleh, mihingte bangmah a hih loh lamhong theisak hi.Bang ci bangin hong thei sak hiam cih leh, kei mah mah ka taang zo kei aa, pau nuam ta leng zong kammal khat pau khiat zawh na ding thaa ka nei kei hi.Bang zah dongin ngaihsun ka hiam cih leh, mikhat in hong hopih ciang Hawi cih aa kammal khat dawnding pen sum zathum bang tawh hong kiguai ding hi leh zong  kiman ka sa kei lai hi. Tua lai takin, Pasian in bang hong gen hiam cih leh, Kam Hau aw, `" Na kam pau pau ngei te ngaihsun kik in, koi pan a ging hiam " hong ci hi. " Ken Topa thei keng " ka cih leh, maan hi, aw ging mal pen kei maa hongpiak hi, hong ci hi. Ka lungsim tawng pan ka
ngaihsut ciangin, awging pen, koi ci bang aa hong kipan aa, ngaisun in ngaisut bang bang pau khia in, awging mal a om pen Pasian hong piak thupha hih na ka phawk aa, Pasian hepih na ka phat hi. Tua akipan in, la sa a hi zongin, thungen a hi zongin thu gen a hi zongin, a ging thei pen, angaih theipen aa Pasian phat ding ka lung  ngulh mah mah pah hi.
 
Hih ni thum hong cin' ni nitak lam nai 4 pawl dingin ka pumpi sung pan khat vei ka pai khia kikleuleu hi. Hih pen Pasian in misi te bang ci sih aa, haan aa kiphum te  luangte bang ci om aa, piangthak te leh, piangthak lote ki lamdan na Pasian in hong lak nop man in hi bangin khat vei ka pumpi sung pan paikhia kik ka hi zaw hi. Hih hun sungah ka paikhiat daan pen, lamdang ka sak mah mah leh a sisa mi tampi tak te zong hi bang lian mah dingin ka um hi.Ka nuntak na pen, ka khe me dawn pan dam dam in hong bei in, ka diip ciang hong tungin, ka diip nuaisiah teng a si khin hi ta hi.Tua lai takin khe nei ka hih lam zong ka ki thei nawn kei hi. Tua khit ciangin ka khut me dawn pan kipan kikin ka banbul ciang hong tung-in ka khut teng si khin ta hi. Ka nuntak na pen ka diip leh ka lu kikal teng ah ka om aa, ka lu panin, ka nuntak na hong bei den den in, ka gawl ciang hong tung in, ka lu lamah kei ka om nawn kei hi. Lungtang gei tengah kei ka om aa, tua sungpan in mun khat hong ki hong khia bang khat in hong om aa, tua pan kapai khia hi. Kapai khiat khit phet lian in Vantung mite nih mah in hong dom to pah lian in, Van kim laiah hongtum' pih uh aa, Van kimlai panin ka pumpi hong en suk sak uh hi. Tua laitak in ka pumpi pen, mite muh na  ah misi luang bang hi ta hi. A hih hang kei pen, si het lo in a nungta sinsen mah in vankim lai pan in ka om na pumpi ka en suk hi. Ka et sukleh ka pumpi pen gina kasa het kei aa, ka pumpi sungah luut kik aa, ka om kik ding bang ka uut kei phial hi. Bang hang  hiam cih leh, tu ma diak aa, Vantung Paradise khawlmun nuam aa ka khaa pumpi tawh  kikhaai lua mahmah ahih man hi. Vantung aa ka pumpi pen hih leitung daan tawh ka seh ciang pii7 bang pha dingin ka um hi. Vantung ah mite pen kigol thei in, mel zong hoih thei mah mah in, a dah maai, kah maai cih bang om lo-in kimaai tai ziahziah hi. Tua munah a om ka pumpi pen leitungaa ka om na pumpi tawh kikhaai lua mahmah ahih manin, leitung ka nuntak kik ding bang ka uut nawnkei phial hi. Tua ka et suk lai takin ka pumpi geiah a tuu mite zong ka mu hi. Amau kap hiam, kap lo a hiam , dah hiam, dah lo hiam ka thei kei hi. Ka pumpi geiah om a hih lam ka mu hi.Tua lai tak in dawi mangpa satan in ka pumpi laak sawm in ka pumpi geiah om hi. Tua ka muh ciangin kei zong Zeisu Khazih min tawh kiheem in ci-in thu ka pia hi. A hih hang a man' thu don lo hi. Satan aw, Mawsi luang na luut sawm bangin ka luang luut sawm ken. Mawsi hun leh tu hun pen kibang lo hi. Tuhun pen Zeisu min tawh  na kisep hun hi aa, Khasiangtho vangliat na tawh a kikal suan hun hi, ka ci hi. Tua lai tak in Roman 8:26 sung a om bangin Khasiangtho in keima kam zangin, satan hong taai aa, tua lai tak lian mah in ka pumpi gei ah omthu-um mite in kamtuam tawh thu nangen uh aa, Khasiangtho  taai
na hangin satan ka pumpi kiang pan kiheem khia hi. Hallelujah.
 
Tua ciangin, Vantung mite in ka pumpi sungah hong kha kik in, tha khat thu in ka lup na pan ka tho khia pah aa, ka dam pah hi.Lupna tung pan kum khia in, tutphah tungah ka tuu aa, thu-um mi te in, ka lu tungah khut hong nga in Pasian hehpihna ka phat khawm ngeeingaai uh hi. Hih hun sungah Pasian in hong lak te pawl khat kong gen nuam hi. Pasian in bang teng hong lak hiam cih leh, Gupna ngah mite sih na hong lak hi. Gupna ngah mite a pumpi leh a khaa a kikhen lai takin a kiim aa mite dah in, kapin a om lai tak mahin a si ding mipa tung leh a gei a tuu mite tungah Vantung mi siangthote nih in, a nuntak na a bei ding ngak in a tungah kipei pei in na om uh hi. A nun takna hong paikhiat lian in Vantung mite in len in dom to pah in Vantung Paradise khawlmun nuam ah luut pih pah hi. Hih thu pen, thu-um mite in  mu thei hi leh, gupna ngah mi khat a sih ding ciangin a kap kap sangin lungdam na pawi lianpi bawl zaw
dingin ka um hi. Gupna ngah lo mite a kha leh a pumpi a kikhen ding laitak in dawi te nih in a ma tung teng ah hagawi in kipei pei in na ngak uh hi. A kha leh a pumpi a kikhen khit phet in dawi te nih in len pah in paipih pah ving veng aa, lei nuai ah lut pih in,Hell khuk pai na lampi ah va puak uh hi.
 
A hih hang, a meikhuk sungah ki khia pah lo in, a mei a tun maa, mun tuam khat om phot in, tua munah a kikhiat khit teh, ama thuthu a, a mahin Pasian thu a up loh na, a donh lo na, a mawhna tawh kisai, a mawh na mah in, a mah heencip in puak puak a hi hi, Ama le amah dam dam in zuan zuan in, Hell khuk a tun ciangin a tung sa khate in laaigawp in, kap ziah ziah sa in Hell khuk ah a tung ka mu hi. Tui duh ing, tui duh ing ci-in awng ziah ziah uh hi.
 
Tua khit ciangin, Vantung mite in haan ah hong paipih in, haanah mi kiphum te ii kilam dan na hong lak hi. Gupna ngah lo mite kiphum na haan pen ap kaai gawp in luisuah gawp hi. En leeng ih lung khawng hong ziing sak hi. Gupna ngah mite ki phuum na mun pen siangtho in en leng ih lung nuam mah mah hi. Ahih zongin Gupna ngah mite ki phum na pen khen nih in kikhen aa, leitung a nuntak sungin Pasian kammal bang aa nungta aa, mawh na bawl lo, a siangtho din munah a ding, mawh baanglo mite ki phuum na haan khuk tungah vantung mite  nih in cing hi. Gupna ngah a, a nuntak sungin mawhna hong bawl aa, Pasian kammal bang a nungta lo, Pasian deih na bang a mang lo mite ki phuum na haan tungah dawi te'n uum ngeei ngaai in, diangziah ziah in, Pasian to na in nei uh hi.  " Na
kheempeuh a piangsak a vanglian Pasian aw, hi taak aa na tapa pen ka mi dik hi ci aa, na  ciapteh mipa a dikna koi ah om hiam, tua ni, tua hun in, tua munah a bawl mawh na tua takah  a gen khiat kammal, a nuntak zia te ci-in pu laak in Pasian to na in nei uh hi.Ka tapa ka tanu pen midik hi, ci kheem cin' a mawhna hi teng a om va le " ci-in Pasian to ziah ziah uh hi. Tua thu ka muh ciangin ka thaa hawm in ka dah peuh mah hi. Tua lai takin Vantungmi in bang hong  gen hiam cih leh, tua zahpi in dah ken, Kumpi Zeisu in vanglet na leh minthan na tawhmeei tung tuangin hong paiciang, dawi te ii ukcipmipa luang pen ama khaa tawh hong kigawm kik in haan khuk pan hong tho khe kik ding aa,sih na  aw, na  zawh na koi ah om hiam, sih na  aw, na guu koiah om hiam, ci-in haan khuk leh a kiim aa om dawi te samsiat in aw lianpi tawh kiko in hong tho khiading hi. Tua ciangin dawi te'n bangmah cih thei nawn lo ding hi, hong ci hi.Tua ciang kei zonglungdam huai sii ka cih lehVantung mi-in tua zahin lah lungdam huai lo hi. bang hang hiam cih lehZeisu hong pai baih leh dawi ten' Pasian a to na uh khawl baih ding, daai baih ding hi. Zeisu hong pai pak nai kei leh dawi tem' hun sawtpi la in, Pasian to to lai ding hi, bang hang  hiam cih leh, gupna ngah mi khat in mawhna a bawl  ciangin dawi mangpa in nuam in Pasian dah hi. Gupna ngah mi khatin dik takin a nuntak leh Pasian nuam in, ki-aang tang sakin, dawi mangpa dah in mai mial hi. Tua khit ciangin mawhna  a bawl mite, khaa te Vantung ah thaman kipiak laitak in a kuun cip dingmite hi, cih hong gen hi. Tua baanah mite thaman saang in a lungdam ziah ziah lai takin, mawhna  a bawl den' tua piangthak pa khaa pen khuadaak ngam lo-in kuun cip hi. A kuun na munah ama bawl mawhna pen a mit in mu a hih man in zum lua kisa in, a nung lam leh et leh zong a khua daak daak na mun kheempeuh, a et et na mun kheempeuh ah ama ii bawl mawhna kheenpeuh pen a mai ah kician takin `kilak siangahih manin na sa in kisiik peuh mah a om zong ka mu hi. Tua hi-in, Vantung mite pen nam tuamtuam a om zong ka mu hi. Pasian min a phat pawl khat om aa, a si mite khaa vantungah a puak zong pawlkhat om aa, a nungta lai mite a keem zong pawl khat om aa, gupna ngah mite luang a keem zong pawl khat om hi.Tua sungah Pasian in hong muhsak pawk khat gupna thu gen aa, khaa mang thang te a ding thungen aa, a neihsa te Pasian a ding a zang khia mite pen na sem  a man lah mah mah bang in ki mu hi. Kha mang thang taa ding aa thu la ngen lo, a neihsa te Pasian aa ding a lah zangh lo, Gupna thu lah gen lo aa, a omte pen a ih mu bangin ki mu hi. Dawi mang pan' thu-um mite ngah nang ha za a hih manin
Pasian tate a ih mut thei thei nang in khim hi.
 
Pasian in bang hong lak lai hiam cih leh, gim na lianpi tawh kisai hong musak hi. Tua pen Hell khuk tung te sang zong, hehpih huai ka sa zaw hi. Gimna lianpi ngah aa, bang zah ta in hehpih huai hiam cih leh mite in " sih na  aw, sih na  aw, si nuam ing " ci aa, awng ziah ziahuh aa, pawl khat te'n gil kial lua mahmah in, khua hong daakdaak in, a huan ding om ta nawn loh a hih ciangin, a nu in a taa, hong man phei in nah, a taa a gawng hong meek lum in,  hong huan aa,a taa sa  a ne hi. Tua khit ciangin,  a taa in, a nu hong mudah mah mah in, a nu that nuam in hong delh aa, a nu lah lau mahmah in taaitaai aa, a hih hangin, sihna in taaisanh ta a hih ciang in, pha dekdek,  saat ta leh saat kha lo, a nu lah lau mahmah in taai den  keei hi. Tua khit te,Vantung pan in vasa lianpi hong leeng suk in, mite uh a muuk hong  ne hi. Hong kuan suk leu leu in, a gil zang  tuh khia hi. Van pan gialpi hong kia suk in,  a mite kha lo in nah, a kiang
diak a hong tu in, a mite lau in diang keei uh hi. Sing lianpi te hong puuk suk in, a sing hiangte in a mite delh bang hi napi, a mite a hiang
kawm teng ah, hong om lai in, lau lua mah mah uh hi. Tua teh  kha te hong san  ziah ziah in, Vaan a a om vangliat na te ki liing ziah
ziah in nah, aaksi te hong kia ziah ziah in, mite awng ziahziah, kap ziahziah uh hi.Tua lai tak in, gupna ngah mite pen Tuuno Mo-pawi ah, nuamtak in a om uh hi. Hih mite a ding pen Heel khuk sung sang in zong, gim huai zaw ding ka ngaihsun phial hi.
 
Satan in, ka luang hong laak nop pen zong, a thukhat om ahih hun lam hong phawksak hi. khatvei  Pasian in Gupna thu gen dingin
mun khat a pai ding in hong sawl napi, misi vui dingin ka pai hi. Tua hang a hi hi. Leitung ih nuntaak sungah, na dang ih sep kheenpeuh te pen, Vantung ah na ki ciam teh lo-in, ih sep kawm a hih kei leh ih nasep na mun ah, mite  gupna  ngah theih na ding a, ih thugen te leh ih teci panh na neu neu te, Vantung ah, na ki naak tepteh mah mah hi. Ka lung kim mah mah khat ah, thu a ciamteh lai-at pa pen, mi maai na doi het lo-in,  a maan lo peuh na ciamteh het lo hi.
 
Tua ahih manin Nu leh Pa U le nau te aw, hun ih ngah bangin Pasian aa dingin genkhaitna tawh a hi zongin, thunget na tawh a hi zongin, piak khiat na tawh a hi zongin, ih hih theih na bang ciat ah nasem khawm dingin Zeisu min tawh hong hanthawn ingh. Pasian in hih hong  lamlah pen, khen thum in hong khen aa, a masa pen Vantung gam nop ci zia thu hong lak na hi aa,  a nih na pen, mi-hing te bangmah hih lohna hong lak na hi. a thum na pen, mite a sih ciang, koi ci sih aa, misi te luang te koi ci om hiam cih Pasian in honglak a hih manin, Pasian hehpihna ka phat hi. Hih thu teng pen na um aa, na um kei zongin, mai lamah piang teei teei ding, Pasian in hong lak thu a na hi hi. Pasian in hih hong lak na pen Pasian na sem ding, a siangtho  nuntakna  ah nung ta ding, Pasian min thang sak dingin, hong deih ahih manin, hih bang teng hong lak hi. Ih nuntakna sungah Pasian deihna banga, ih nuntak thei na dingin Khasiangtho Pasian in thu-um mi khat ciat hong makaih hong lam lak ta hen. A men.
 
Khazih sung ah,
 
Sia Kam Hau
 
00000000000000000000000000000000000000000000
 
A NIH VEINA LAIBU HAWM KHIAT KIKNA THU
 
1988 Kum May kha pawl in Sia Kam Hau ii " PARADISE KHAWL MUN NUAM KA VA PAI PAK NA " cih tetti pan na laibu neu laimai 20 a pha khat S.C.L.S ( Siyin Christian Litterature Society ) pan Dr Mang Cin Pau ( Dr. Mang Pui ) leh Siama Ciang Za Dim te ii hanciam na tawh a khat veina ki hawm khia thei hi. Tua khit a sawt lo-in Rev. Kham Za Pau ( late)  in tua laibu mah kawllai tawh translate  bawlin   hong hawm khia kik a, mitampi in ki hamphat lawhpih ciat  hi.
 
Pasian hong vaihawm sakna tawh Sia Kam Hau pen 2011 Kum April 6 pan May 18 ni dong Australia gam  Khuapi lian teng leh
Pawlpi tuamtuam te ah Gupna thu tangko ding leh Pasian hoihna thu gen kawikawi ding in hong zin thei a, lecture hong piakna leh thu hilhna te ah Vantung gam nopcit na thu tampi hong gen zel a, mipi in Vantung gam thu tawh kisai abucingin  simh theih ding lunggulh na a ki nei ciat laitak in Siama Ciang Za Dim in tu ma kum 20 val pek a, a bawl uh laibu na keem  kha lai citciat hi. A laibu pen  photo copy leh  computer sung pan  scan in hawm khiat ding a ki vai hawm hangin  a laibu lui lua mah mah ta  a hih manin ki cian taktak  zo  mel non lo hi. Tua  a hih manin a original laibu sung bang lian in khen ( type) kik in online pan mi tampi te ii simh theih ding ki gel leuleu a, Sia Kam Hau kiang ah laibu  hawm khiat kik ding phalna a ki nget ciangin lung dam tak in hong sang a, a laibu teng laimal gawm dan pan kipan a ma ii original bang lian in kei man ka na khen ( type ) kik a, ka  zawh teh Yangon ah Dr Mang Pui  kiang leh Melbourne ah Siamah Ciang Za Dim te kiang ah edit sak kik in,  a mau edit na teng hong puak kik khit teh,   Leitungbup mun tuamtuam gam tuamtuam a om Vantung gam nopna thu a lunggulh mi kheempeuh tung ah online pan a ki simh theih dingin hong hawm khia sawn kik hi ingh.
 
Hih Sia Kam Hau ii tetti pan na thu a simkha mimal khatsim tungah In Biak Topa Pasian in  a ki cing Thupha hong pia kim ciat ta hen...Amen.
 
A hawm khia kik
 
Kam Za Pau
Perth, Western Australia
5 June 2011 ( Sunday )

Contact details

Address

Full Gospel Assembly-Tulsa
7401 S Memorial Dr
Tulsa,OK 74133

Email Address

This email address is being protected from spambots. You need JavaScript enabled to view it.

Phone Number

918-286 8673, 918-286 8736

Quick Contact

JoomShaper