“Pasian in Leitung it mahmah ahih man in, a Tapa neih sun hong pia hi” cih John 3:16 na-ah ih sim hi.

 

Hih Leitung cih kammal pen “KOSMOS” ci in na ki gelh hi. Hih leitung (Kosmos) sungah, ih nuntak khuasak leh thu ki puakzia (social-cultural system), leitung ki uk zia (political system), sum bawl zia (economic sytem), Pilna zonna leh kihilhna (education system), biakpiak zia, Pasian tawh kizop zia (spirituality) cih te khempeuh huam hi. Hih teng khempeuh ama' deihna bang a piang mateng tatkhiatna bu cing ki ngah lo hi.

 

Hih system khempeuh Pasian zia leh deihna bang a a pai ciangin Pasian min thang hi. Pasian deihna bang I sep theih na ding in Pasian in thukhun bu khat hong pia a, tua pen LAI SIANGTHO hi. Lai Siangtho in I nisim nuntak na ding, biakna makaih zia ding, leitung ki uk zia ding, u leh nau thu ki puak zia ding, midang te tawh kizop zia ding a cing tak in hong hilh hi. Mihing in Lai Siangtho cih bang lo a leh lam a, ci leh sa ading thupha zonna a sep ciangin Pasian deih tatkhiatna (redemptive order) pen a lum a let suak hi. Tua pan in Pasian min thang lo in Pasian min dai na piang sak zaw hi.

 

Na nasep khat peuh ah Topa dong in, nang a pil in ki ngaih sun tawm kei in (Pau 3); Navai te (na makaihna, geelna,) khempeuh Topa aap in, amah muangin, aman hong sem ding hi (Late 37). Pasian zah takna in pilna kipatna hi ahihi (Pau 1:7)

 

John T Hum