ANTUNG GAM TUNG DING KUATE HIAM? (Mt.7:21-23)

Vantung gam a tung ding kuate ahi tam? Tuiphumte maw, AGte maw, RCte maw, SDAte maw? Topa Zeisu in vantung a ka Pa deihna bang a gamtate bek tung ding ci hi. Topa Zeisu in vantungah tung lo ding a cih kuate hiam?

1. Zeisu pen “Topa,Topa”a cite:

Zeisu pen Topa a cite Tapidawte i hi a, Tapidaw khempeuh vantung tung kim lo ding cihna hi pah hi. Zeisu pen Topa ci-a nisim a sam dente pen thungenngente zong hi a, thungenngente zong vantung tung kim lo ding hi. Pasian deihna bang a gamtate bek tung dinguh hi.

2. Zeisu min tawh thuhilhte:

Pasian thu a gen thei khempeuh, Pasian nasem khempeuh vantung tung kim lo ding cihna hi. Tuhun ciangin Pasian thugen a siam tampi om a, Lai Siangtho sang a zawh manin Pasian nasem zong tampi om hi. Thugen siam pawlkhat, Pasian nasem pawlkhat vantung tung ding a, pawlkhat tung lo ding, ci hi. Pasian deihna bang a gamtate bek tung ding hi.

3. Zeisu min tawh dawi hawlkhiate

Zeisu min tawh dawi hawlkhia tampi om hi. Zeisu in dawi hawlkhiat ding a vangliatna a piak, dawi a hawlkhia nungzui 12 lakah Judah Siakazuh zong kihel hi. Tua ahih manin dawi hawlkhia khempeuh vantung tung lo ding a, Pasian deih bang a gamtate bek tung ding hi.

4. …Nalamdang bawlte:

Pasian in Egypt gamah gimna nam 10 a tunsak lai-in Mawsi bawl nalamdangte mah bangin Faro’ dawi aisanten zong bawl thei hi. Zeisu min tawh nalamdang bawl pawlkhat vantung tung lo ding hi. Pasian deihna bang a gamtate bek tung ding hi.

Tua hi leh, Pasian deihna bang a gamtatna pen bang hi a, Pasian deihna bang a gamta kuate hiam?

1. Thukham a zuite ahi ding hiam?

Lai Siangtho sungah thukham zui a kisate pen Phazisete hi. Thukham 10 nen suahin thukham nam 613 suah uh hi. Hih thukham 613 teng zuih ding hanciam uh a, lengmasel nangawn sehsuah pia uh hi. Lampi ah ganhing khatpeuh a siklup khak ding kidawm uh hi. Thukham neuno khat nangawn zuih ding hanciam uh hi. Tua hi napin Topa Zeisu in “Vantunggam tawh na kigamla kei hi (Mk.12:34) ci hi. Tua banah “Tua Phazise-te sangin na gamtat uh a hoihzawk kei leh vantung gam na tung kei ding uh” ci hi (Mt.5:20). Tua manin vantung tun nading Pasian deihna bang a gamtatna pen thukham zuihna hi lo a, Pasian deihna bang a gamta pen Phazise-te hi lo cih kitel mahmah hi.

2. Gamtat hoih a gamtate hi ding hiam?

Lai Siangtho in “Midik khat beek om lo, a hoih a gamta khat beek om lo” ci hi (Rom.3:10,12, Lt.14:3). “Note gamtathoihpen zong belpuansia tawh kibang” ci hi (Isa.64:6). Pasian in i gamtat hoihpen nangawn kihhuaisa a, Ama deihna bang a gamtatna’n hong sang zo peuhmah lo hi. Banghang Pasian in i gamtat hoihnate vantung tun nading Ama deih bang a gamtatna in hong sang zo lo hiam cih leh-

(a) Mihing khempeuh mawhnei i hi a, mawhna tawh kipelh thei lo (Rom.5:12, 3:23). Mihing khempeuh mawhna kung i hi a, gamtat hoihnate pen a gah limci, a hoih hi lel ahih manin kuamah mawhna tawh i kipelh thei kei hi.

(b) A hoihpenpen i gamtatna zong Pasian in kihhuaisa lel hi (Lt.14:3, Rom.3: 10,12, Isa.64:6). Aman hong sang zo lo ahih manin ongmat hong pia lo ahi hi.

(c) Pasian pen lungsim ngaihsutna tawh thukhenpa hi (Jer.17:10). Mihingte in a pualam a kilangte bek mawhna khialhna’n kingaihsun a, Pasian in lungsim ngaihsutna pan thukhen hi. – Numei khat khialh nopna lungsim tawh a ente mawh khin (Mt.5:27, 28). – Duhhop huaihamna pen milim biakna (Efe.5:5) – Mi muhdahna pen mi thahna (1Jn.3: 15). Mihing khempeuh mawhna tawh kipelh thei loin i gamtat hoihpen zong Pasian in Ama deihna bang a gamtatna in hong sang zo lo hi. Mi khempeuh i mawhna thaman sihna thuak ding vive ihi hi (Rom. 3:23 ,6:23). Tuikia le tuikia kihon thei lo, a hon ding tuikia lo khat a kisap bang i hi hi. Mawhna tui sungah kia-in kuamah i kihon thei kei a, mawhna nei lo khat in hong hotkhiat ding i kisam hi. Tua manin Pasian in mawh nei lo, a Topa Zeisu Khazih leitungah hong paisakin, i mawhnate Ama tungah kisuan a, (Isa.53:5) i mawhnate hong puaksakin (Jn.1:29), mawh nei lo mi hong suak sak a, (2Kor.5:21), mawhna hang a daan khempeuh le mawhna thaman sihna hong thuaksak hi (Gal.3: 13, 1Pit.2:24).

Pasian a lungkimsak mi khat bek om a, tua pen a Tapa, Zeisu Khazih ahi hi (Jn.3:17). Topa Zeisu in Getasimani huanah “Nangma deihna bang hi ta hen” ci hi (Mt.26:39), “Ka Pa deihna bangin a gamta ka hi” ci hi (Jn.6:38). Tua manin Pasian deihna bang a gamta pen Topa Zeisu bek hi. A Pa deihna bang a gamtatna in eite mawhna thaman ahi sihna hong thuakna ahi hi. Pasian in Abiahang pen a gamtat hoihna hangin midik mi siangthoin ciamteh lo a, a upna pen diknain ciamteh hi (Rom.4:23-24). Tua mah bangin Pasian deihna bang a gamta Topa Zeisu kei tang dingin si hi, cih na up, na sanna pen Pasian in nang midik misiangthoin hong sangin A deihna bangin a gamta-in hong ciamtehin vantung a tung thei ding na hi ta hi, Haleluijah!

Ki-apna:

(A gingin simkhia inla na lungsimtawng pan ki-ap takpi in) “Topa Pasian aw, vantungah Nang deih bang a gamtate bek tung ding ahih na tuni-in nong tel sak hi. Nang deih bang a gamtatna cih pen thukham zuihna le gamtat hoihna ahih loh lam zong nong telsak hi, ka lungdam hi. Vantung gam tun nading Nang deih bang a gamtatna pen ka mawhna thaman a si Topa Zeisu ka up ka sanna hi, cih nong telsak manin ka lungdam hi. Topa aw, ka mawhna hangin nang mawhlawh hong tawisakin ka mawhna thaman ahi sihna nong thuak sak a, na sisan manpha tawh ka mawhna khempeuh nong sawpsiangsak manin ka lungdam hi. Na dikna le na sianthona kei adingin ka sang hi. Ka Gumpa le ka Topa dingin kong sang hi. Tuni a kipan Na ta, Nang’ aa, Na innkuanpih ka hi ta a, vantung a tung thei ding ka hi ta hi. Topa Zeisu min tawh lungdam koin kong ki-ap hi, Topa Pasian aw. Amen!

Source: Zangkong Awging Jan/2019