PASIAN’ DEIH KHANGGUI KIZOM THUPHA -Rev Suak Za Go
Thuciam Lui (TL) hunin Pasian’ lawmpa cihna a ngahpa pen Abiahang ahi hi (Isa 41:9; Jeim 2:23). Abiahang in Pasian a upna pen a tu khang dong zuisak zo a, keemsuak zo hi. Tua ahih manin khang kizom thupha i ngah nadingin upna lam a, i pa Abiahang i etteh nadingin a nuai-a bangin en dih ni.
1. Thuman’na:
Pasian in thuman’na pen sagawh biakna sangin deih zaw a, upna tawh thuman’na hangin a lungkim Pasian ahi hi. Abiahang in Ur khua ah a teen’ laitakin thupha a ngah theih nadingin Pasian in a sapkhiat ciangin bangmah dongkik lo-in, thuman’na tawh kithawi-in paikhia hi. Pasian’ sawlna mangin nitumna lam, nisuahna lam, saklam, khanglam zuat nading nangawn dongsuk dongto nawn lo-in paikhia hi (Pai 12). A paikhiat khit ciangin Pasian in a pai nading zia hilh pan hi. Tua mah bangin Pasian in ama deihna thu khat peuhpeuh hong hilh a, ama’ deihna hi, cih thu i theihtel nak leh thuman’na tawh dingkhia le’ng, sep ding maban khempeuh thuman’na lampi tungah hong hilh pan thei hi. Pasian in i mai-ah pai-in hong makaih bek hi lo-in ama’ deihna mangin i din’khiat hun ciangin zong i nungah hong zui-in hong tawsawn a, hong ompihin leitung a bei dongin note tawh kong omkhawm tawntung ding hi, a ci Pasian zong ahi hi. I buai theihna thu in Pasian’ aw leh Satan’ aw i khentel theih lohna hang ahi hi.
2. Pasian’ deihna theihtelna:
Abiahang in Pasian’ thu mangin Ur khua pan a paikhiatna pen thupha a ngah nading Pasian’ deihna hi, cih teltakin theihi. Khang kizom thupha ngahna pen Pasian’ deihna hi, cih upna tawh teltakin thei-in i lak ding kisam hi. Pasian’ deihna i tel nop leh ama’ kammal Lai Siangtho bangbangin thumang le’ng Pasian in ama’ deihna hong hilh ding hi. Rev. Hau Lian Kham in, “Gupna ngahsa thu-um mi khat in thungetna tawh a apna bangin a kituakto diamdiamin hong pian’ leh Pasian’ deihna hi hamtang hi,” ci hi. Pasian’ deihna om lo-in i hanciam khak leh lunggimna le kitasapna hong piang ding hi. Topa Zeisu in, “… kei’ sungah na om kei uh leh bangmah na hih thei kei ding uh hi,” ci hi (Zhg.15:5). Tua ahih manin na khat peuhpeuh i sep ding ciangin hih ka sepnop nasepna pen Pasian’ deihna ahi takpi hiam, cih thu theihtel masak ding kisam hi. Khat veivei i ut luatna, i lunggulh luatna le i deih luatna pen upna ahih kei leh vision kisa kha thei hi. Upna i cih pen Pasian kiang pan bekin hong pai a, mihingte’ lungsim pan a, hong suak tawm hilo hi.
3. Tu-le-ta khang dongin Pasian pen aituam Pasian suahsak zawhna
Hih thu thumna pen a thupipen a, i gennop thu ahi hi. TL sung mun tampi ah Pasian in amahmah Abiahang’ Pasian,Hih thu thumna pen a thupipen a, i gennop thu ahi hi. TL sung mun tampi ah Pasian in amahmah Abiahang’ Pasian,Izet’ Pasian, Zakoh’ Pasian kahi hi, ci-in gen hi. Hih thu pen a thupi mahmah Abiahang’ thusim ahi hi. Pasian le amah bek kikal a, a neih midangte tawh a kilamdan’na thusim ahi hi. Bang hun, bang hunin leitung-a Pasian’ mizat mite in amau le Pasian’ kikal ah thusim khat peuhpeuh nei hamtang uh hi. Thudang khatin gen le’ng Pasian’ aituam pahtakna zong kici thei hi. Pasian in a hehpih nopte a hehpih, a gup nopte a gum Pasian ahi hi. Thu-um mi khempeuh in eite’ tung-a aituam a, hong kipia Pasian’ pahtakna thusim teng gawm khawmin lungsim takpi tawh naseem khawm le’ng buaina bangmah om lo-in, Pasian’ min thang ding hi. Kipil sakna, kihawm thawhna, kisim mawhna, midangte neu muhna, kiphinna le kithusim lohnate om lo-in Pasian’ gam zai ngeingei ding hi.
Banghang hiam cih leh mimalte’ tunga Pasian’ piak talen ciat kitel sak a, kithupisim sakin i meet bawl theihloh manin khat-le-khat kitel khialhna piang a, Pasian’ nasepna a nopna le a thupitna tel zo lo-in, eite’ tung-a hong kipia nasepna sangin midangte’ nasepna i buaipih kha thei hi. Leitungah Pasian’ mizatpa Dr. Billy Graham pen a khan’tawn a, Pasian’ mizatpa cih minphatna a ngahna in: Pasian in amah pen Lungdamna Thu a tangko Evangelist dingin a sapna thu theitelin, hih Pasian’ deihna tawh kituak Evangelist nasepna bekbek mah thumanna le cihtakna tawh a khan’tawnin khahsuah lo-in a sep man hi ding hi, ki ci hi.
Tua ahih manin Topa Zeisu in “… lawmte kong ci ding hi…” (Zhg. 15:15) a cihna ah a Pa, Pasian kiang panin a zak thute khempeuh hong theihsakna hang ahi hi. Tua in a Pa, Pasian in Abiahang pen ka lawmpa hi, a cihna hong lak hi. I lawmit taktakte’ kiang bekah i thusim i gen ngam bek mah bangin Topa Zeisu in ka lawmte hong cihna tawh ama’ thuthuk le a thusimte hong genna pen pilvang takin i tel ding, i bil i vaksak ding kisam hi. Mihingte’ nuntakna sungah na i sakpen khat in, i ki-itpih mahmah i lawm khat in hazatna tawh thuman lopi-in hong telkhialin hong langpan’na ahi hi. Mihing khat-le-khat lawmta i hihna pen tua bangin kisia thei a, ahi zongin Topa Zeisu in ka lawmte hong cih ciangin a tawp dongin hong it suakin, eite’ tungah hong thuman paisuak hi. Hih thupha pen khang thum khang li dong Pasian’ thupha luahna thupha ahi hi. Pasian’ naseempa, Pasian’ naseemnu hihna sangin Topa Zeisu in ka lawm hong cihna teltakin thei le’ng, Pasian’ aw za-in ama thusimte i theitel ding hi. Tua thusim tawh naseem le’ng Pasian’ nasepna nuamsa-in midangte’ nasepnate va sai nuamse lo, va buaipih se lo-in eima’ mun ciatah lawhcin’na le Pasian’ deihna tawh kituak pumpi khat tung-a pumpi nate bang-a nasep khopna hi ding hi.
Thu-um piangthak mi khempeuh in eima’ mun ciatah Pasian’ naseemte ihi hi. Tua ahih manin Abiahang bangin i tu, i tate’ khang dongah i biak Pasian pen eimah ciat adingin i gamhluah (gou) ahidingin i kiplet ding, ki-apin upna tawh i nuntakpih paisuak ding kisam hi. Hih thu ah i pu pen Tapidaw a na suah manin tu dongin a tute zong a ngeina tawh Tapidaw mah hihsuakna ciang bek hi lo ding hi. I pu pen Pastor ahih leh a tupa dongin Pastor mah suakin nuamsa ding, i pu pen pawlpi upa a seem ahih leh a tupa dongin pawlpi upa nasep mah ah thumanna le cihtakna tawh zom suak hamtang ding cihna zong hi pah lo-in i pu i pate’ thu upna ah kipin Pasian’ thu aituam ngaihsutna tawh mite’ mai leh Pasian’ maiah limhoih limpha lakin nuamsa ding, cihna ahi hi. Pasian’ thu lunggulhin i up, i san’na pen a khang a khangin gamhluah bangin kizomsuak ding hi. I nu-le-pate in Pasian’ thu mah lunggulhin Pasian it mahmah napi, tate pen pianthakna nangawn kician meel lo cih bang hilo ding hi. Leitung-a om Tapidaw biakna khempeuh pen a kawk baanglo, a kicing om lo hi, ahih hangin Lai Siangtho tawh kituakpen hi ci a, i teel i zop biakna zong i tate le i tute dongin thumanna le cihtakna tawh letkip ding, panpih paisuak ding kisam hi. Pasian pen ka pu’ Pasian, ka pa’ Pasian le keima’ Pasian hi, ci-in angtangin hang takin teci pang ngam ding, Pasian in zong Keimah in na pu’ Pasian, na pa’ Pasian le nangma’ Pasian ka hi hi, hong cihna aw kitel takin za zen le’ng bang zahin nuam ding ahi hiam?
Tua bangin Pasian pen angtan’pih a, mite’ mai-ah teci i pan’ theih leh Pasian’ thupha in khang thum, khang li dongin hong zuito ding ahi hi. Bang hang hiam cih leh gupkhiatna pen Zeisu Khazih sungah Pasian’ hehpihna hangin thu upna tawh a khawnkhongin i ngah a, ahi zong in thupha pen Pasian tung-a thumanna le manpiakna tawh kingah hi. Khan’tawn i man’ ding thupha pen Pasian in minit khat sungin hong pia thei a, ahi zongin lamdawt tawnin hong pia ngeilo hi. Chianmaung mehtui thuk bek i duh leh i huan sungah suan pak le’ng kha thum sungin kingah mah ding a, ahi zongin dolsing manpha tawh a kibawl van manpha i deih leh a tawmpen kum 60 sung ngak kul ding hi. Tua ahih manin a manpha taktak thuphate pen man piain lungkia lo-in, hun sawtpi sung ngak kul hi. Pasian’ adingin i sepnate ah thumanna le cihtakna tawh kipum piak a, lungsim khempeuh, pilna khempeuh le hatna khempeuh tawh sep ding ahi hi. Pasian’ tung-a ka thumanna le ka cihtakna tawh keima’ khang hunah thupha ka ngah nai kei leh zong ka tu-le-tate’ khang hunah na ngah veve ding uh hi, cih zah dong-a Pasian muan’na le kipiakna tawh kingah ding hi. Sawt veipi a kimang khang kizom Pasian’ thupha pen vantung panin i omna munah hong kipia suk ding hizaw a, zon’ zawh thu, hanciam zawh thu le mite kiang panin thalawh tawmna le ngetsiamna tawh ngahna hilo ding hi.
Topa’ na i sepna ah a zawng ngamte hau ding a, a hau pah nuamte in lungkiatna tuak ding uh hi. Haksatna thuak ding a, kizote in thuak kha lo zaw thei hi. A si ding-a kizote sihna tawh kipelh zaw uh hi. Topa’ adingin sihngamna zong nuntak ngamna zahin thupi a, nuntakngamna zong sihngamna zah mahin thupi hi. Tua ahih manin Tapidaw nuntakna ah sihngamna le nuntak ngamna pen a kikimin tonkhawm ding hi. Sihngamna tawh nuntakna kumpilukhu kingah ding a, nuntakngamna tawh thaman kingah ding hi. Topa’ deihna bang a, a kipumpiak mite Topa’n koih khong ngeilo, phawk khial ngeilo hi.
Pianthakna tawh Pasian’ tapa bangin thupha ngahna in khangkhat sung thupha ngahna hi thei a, Pasian pen i tu khang i ta khang dongin up paisuakna le Ama’ tungah thuman paisuakna in khang thum khang li dong khang kizom thupha ngahna ahi hi. Abiahang in a tu a tate’ khang dong thupha a ngah zawh nadingin a tapa khat neihsun meihal biakna ah a piak laitakin gawhlup dingin a kipaipih nangawn a tapa pen ama’ thu mangsak zo hi (Pian. 22). Meihal biakpiak nadingin a tapa Izet in singlom pua-in a pa a zuihna ciang pen ahi ding ciang mah hi. Ahi zongin Abiahang in biakna tau tungah singkeute a koih khit ciangin a tapa pen gawhlup dingin a khut le a khete khau tawh henin biakna tau tungah koihin a tem dok hi. A tapa kitom se lo-in, a pa’ hih bangbang dawh ngiungeu lel hi. Hih pen Topa Zeisu’ lim a kilahkholhna hi. Abiahang pen leitung mi khat hi napi, tua zahin a tapa thu a man’sak zawh pen lamdang mahmah hi. Tu lai hun pata nih, hih bangin kibawl le’ng, i kimang zo ding hiam?
Pasian’ lawmpa Abiahang pen Pasian’ thumangpa, Pasian’ deihna bangbang a zuipa bek hi lo-in, a tapa zong amathuthu a mangsak zopa hi lai hi! Pasian in tawntung Pasian ahih mah bangin ama’ hoihna pen a khang a khangin hong pia nuam hi. A haksat penpen hunin zong Pasian’ adingin hang takin panmun la a, ki-apna le nasepna in sawtpi a kimang ding thupha zon’na ahi hi. Davuih kumpipa in biakinn lam nadingin a kisam nate khempeuh a kicingin kaikhawm khol a, biakinnpi pen a tapa Solomon in lam hi. Hih nasepnate gel pen thupi tuak mahmah a, ahi zongin Pasian in ama’ geelna bangin khang nihna dong semzom sak hi. Pasian’ hehpihna tawh, i pu i pate’ mawhna hangin thukhenna i thuak kha kei hi. Ahih hangin Pasian’ thupha pen i pu, i pate hang-a i ngah zong tampi om hi. Lai Siangtho sungah Davuih kumpipa’ hangin ama’ nungah Pasian in ama’ mite tungah gualzawhna, lungmuan’na le thupha a piak tampi i mu hi. I nu i pate in kamsan’na kammal tawh thupha hong piakna bangin tate tungah a kingah thupha tampi om hi.
Khangluite in zong “nu-le-pate thumang a nahlawh peek” na ci uh hi. Tua hi a, i pian’na nu-le-pate’ thupha piakna hangin zong Pasian’ thuphate hong luang ahih manin nu-le-pate’ maipha zongin thupha kipia sakin upna le lametna tawh sang a, a thu uh i man’ ding thupi mahmah hi. Tua banah eite’ mai a, hong makaihsa i Siate zong lungdamsakin amaute’ thupha i ngah ding zong thupi mahmah hi. Hih thu in Lai Siangtho’ gen khang thum khang lina dong a, khang kizom thupha ngahna thulaigil ahi hi.
Source: Zangkongawging Jan/2020

July 20, 1969 ni-in US te Neil Amstrong (1930-2012) leh Buzz Aldrin (1930b) te Apollo 11 rocket tawh khapi tung va tung uh a, a khe uh tawh khapi va sik uh hi. Tua ni-in US President Richard Nixon (1913-1994) in, “The planting of human feet on the moon is the greatest moment in human history ” (Mihing’ tangthu ah mihingte’ khe in khapi tung a sikna pen hun thupipen hi) ci-in Radio pan tangko khia hi. Tua ciangin Evangelist minthang Billy Graham (1918- 2018) in, “With all due respect, the greatest moment in human history was not when man set foot on the moon, but when the infinite and eternal God set foot on the earth in Jesus of Nazareth” (Zahtakna kong pia hi. Mihing’ khe in khapi tung a sikna pen hun thupipen hilo hi. Mong neilo tawntung Pasian in Nazareth khuami Jesu’ khe tawh leitung hong sik hun pen hun thupipen hi,” ci-in tangko leuleu hi.
1. Tuucingte’ dawnzia (Lk. 2:8-20).
Israel gamah tuucing nasep pen pilna neilote’ nasep, nautumte’ nasep, a guallelte’ nasep hi a, gamlak vive ah om zaw uh hi. David bang amau unau sungah a nautum ahih manin tuu cing kha hi (1Sam.17:14). Jesu’ suahna thu pen kumpite, mipilte leh biakna makaipite sangin pilna neilo, tualniam tuucingte in na thei masa zaw uh hi. Tua pen amau’ kantawm cih zong hilo a, vantung mi in amau’tuucin’na phual gamlak ah a va tangko ngiat ahi hi. Tuucingte in gamlak ah amau’ tuuhonte cingin a om laitakun Topa vantung mi khat va kilang a, amaute lau mahmah uh hi. Topa vantung mi in, “Lau kei un. Bang hang hiam cih leh mi khempeuh’ ading nakpi nuamna thu note kong zasak hi. Tu ni-in David khua-ah Topa Khris ahi hong Gumpa in note’ adingin a suakzo hi. Note in bang limin thei ding ka hi uh hiam, na cih leh naungeek in puan tawh kituun a, bawng an neekna kuang sungah kisialin a om na mu ding uh hi.” ci hi (Lk.2:12). Vantung mi in tuucingte tungah naungeek suah nading mun le a pian’zia ding teng na hilhkhol hi.
Tui pen a sangna pan a niamna mun ah sukluan’ hi. Tua mah bangin Zeisu pen a kiniamkhiat lungtang sungah suak hi. Tu ni tu hunin zong miliante, mipilte le biakna makaite sangin tualniam ahi meigong nupite, mizawngte in Zeisu sang baihzaw uh hi. Tuucingte in Jesu’ suahna thu a zak ciang bek uh tawh lungkim lo uh a, a mit mahmah tawh Jesu mu nuam uh hi. Vantung mite vantung ah a ciah khit uh ciangin tuucingte in, “Eite Bethlehem khua ah pai-in Pasian’ hong lah hih a piangsa thute va en ni,” ci-in khat leh khat kihopih uh hi. Manlangin pai uh a, Mary, Joseph leh bawng an neekna kuang sungah kisiala om naungeek a mu uh hi. Tua ciangin tuucingte in lungdam takin Pasian’ min phat uh hi. Tua banah a zaksa leh a muhsa thute tangko khia uh hi. Eite in zong tuucingte mah bangin Pasian’ minphatna le hong suak Jesu’ thu tangko khiatna tawh lungdam bawl dawn ciat ni.
2. Mipilte’ dawnzia (Mat. 2:1-12)
Hih mipilte pen aksi lam pilna a nei mite ahi uh hi. Lai Siangtho sungah a mi phazah a gen lian loh hangin tangthu bute ah mipil 3 ci-in kigelh hi. Amaute pen khat India pan, khat Arab pan, khat Persia pan ahi uh hi. Amau’ omna mun tek pan nisuahna lam gam pan aksipi khat mu ciat uh ahih manin kumpi khat suak ngelngel ding hi, ci-in thei uh hi. Ahi zongin koi mun ah suak ding cih pen theilo uh hi. Tua a suak kumpipa bia dingin aksipi hong zuih ciat uh leh Jerusalem khuapi ah hong kitun’tuah kha ngeingai uh hi. Amau’ pilna tawh a ngaihsut uh ciangin kumpi khat suak ding cih buang Hezoh kumpi inn sung mahah suak ngelngel ding hi, ci-in um uh ahih manin aksi zui nawn lo-in Hezoh kumpi inn sungah va lut uh hi. Ahi zongin kumpi inn sungah a suak kumpipa na om lo uh hi.
Col.L.Khun Naung pen a zaa lian mahmah napi, kiniamkhiat mahmah hi. Khatvei Bagan khua ah gospel pai hi. Bagan meileeng station ah galkap mangte in motor tawh na dawn uh hi. Amau’ ngaihsutna ah ulianpi khat ahih teh upper class ah tuang dingin ngaihsun uh a,Upper class kong gei ah a va dawn uh leh mulo ahih manun lungmang keei uh hi. A khuadak uh leh Col.L.Khun Naung pen Ordinary class kong pan hong pusuak mawk ahih manin galkapmangte in lamdang sa thei mahmah uh hi. Tua tawh kibangin Zeisu pen kumpi buang dingin kumpi inn sungah suak lo-in, bawng anneekna kuang sungah a suahna hangin tuni ciang dong mi tampite in um zolo, sang zolo uh hi.
Mipilte in aksipi a zuih laiteng naungeek Jesu’ omna mun Bethlehem khua manawh uh hi. Zong tung kuanta uh hi. Ahi zongin amau’ pilna suangin aksipi a zuih nawnloh uh ciangin lampial uh a, Herod kumpi inn sung va tungkha uh hi. Khat veivei mihingte in Kha Siangtho lamlahna zui lo-in eima’ pilna le eima’ theihna suangin i kalsuan ciangin lam kipial thei a, a kullohna mun khawngah kitung kha thei hi. Ei’ hangin a kullo thu tampi piang thei hi.
Kha Siangtho lamlahna zui lo-in, eima’ pilna tawh Jesu i zon’ khak leh i mu zo kei hi. Russian mi Yuri Gagarin (1934-1968) bang in 1961 kumin rocket tawh vantung lamah kah toto-in Pasian va zong hi. A kahtohtoh ciangin na hawm toto lel a, Pasian’ om nading mun dan mu zolo hi. Tua ahih manin hong tun’ kik ciangin Pasian om kei, ci-in hong gen hi. Tua pen mi tampite in um uh hi.
Dr.C.S.Lewis (1898-1963) pen a kipilsak, amah le amah a kiphat niloh khat hi a, a pianthak ma-in Tapidawte langpan’ hi. A pilna suangin Pasian a zon’zonhang, mu lo hi. Pasian in a kipilsakna teng a sukkhap sak ciangin hong piangthak a, Pasian hong mu pan hi. Amah in, “Pasian pen a gamlapi pekah a om ding ka sak leh a nai ah na om gige,” ci-in gen hi.
Mipilte Hezoh kumpi inn sungah a om laitakin aksipi in amau’ tung ah na ngak gige hi. Mipilte in amau a na ngak gige aksipi a muh uh ciangin nuam mahmah uh hi. Aksipi nung a zuihzuih kik uh leh naupang omna tungah aksipi hong khawl hi. Inn sungah a lut uh leh naupang mu uh a, bia uh hi. Hih mipil 3 te in amau’ neih sung pan a manpha pente tawh Jesu na bia uh hi. India mipilpa Melchoir in kham tawh bia hi. Hih in Jesu pen kumpi ahihna lak hi. Arabia mipilpa Balthasar in Frankinses paknamtui tawh bia hi. Hih pen biakna tau tunga kihal paknamtui ahi hi. Hih in Zeisu pen siampi lianpen ahihna lak hi. Persia mipilpa Casper in Mirah paknamtui kha tawh bia hi. Hih pen misite a kizuut ahi hi. Hih in Jesu pen si ding cih a lahna ahi hi.
Ei zong mipilte mah bangin i neihsa sung pan a manphapen tawh Jesu va bia ni. Lamlak aksipi ahi Kha Siangtho’ hong lamlahna bang i zuih leh Zeisu kiang hong tun’pih ding a, ni simin Lungdam bawl i dawn den ding hi.
3. Hezoh Lungdambawl dawnzia (Mat.2:1-18).
Herod kumpipa in Jesu’ suahna thu pen aksipi zuihna pan lam a pialkha mipilte tung pan a zak ahi hi. Tua thu a zak ciangin ama’ kumpi tokhom a suan’khiat khak ding patau hi. Pasian’siampite le laitheite khawm a, naungeek suah nading mun dong hi. Amaute in Bethlehem khua ah suak dingin gen uh hi. Tua ciangin Herod in mipilte samsimin, aksi kilat hun phatak in dong a, a theih khit ciangin mipilte kiangah, “Note pai un la, naupang va hah zon’ un. Na muh uh leh kei kiangah hong genkik un. Kei zong pai-in tua naupang ka va bia ding hi,” ciin vaikhak hi. Herod in Jesu a thatnuam ahi hi.
Mipilte Hezoh kumpipa kiangah a pai nawnloh nadingun a mang sungah kihilh ahih manin lampi dang tawnin a ciah uh hi. Herod in mipilte khemna a theih ciangin a thangpai mahmah a, kum nih nuaisiah pasalno khempeuh a thatsak hi. Herod in namsau tawh lungdambawl na dawn hi. Naupang tampi in sihlawh uh hi. Hezoh zong hampha hetlo hi. Amah in Pasian min phatlo ahih manin Pasian vantung mi khat in thakhatin amah sat a, than in ne a, amah si hi (Sawl.12:23).
Zeisu’ hong suahma hun pen BC (Before Christ) kici a, Zeisu’ hong suah pan AD (Annodomini) hun hong kipan hi. Lungdambawl pen leitung bup in ni thupi khatin a kiciamteh hi a, tua ni-in zum khempeuh kikhak hi. Gam khangtote ah Lungdambawl Hindute, Muslimte, Buddhist te leh biakna namkim in zong bawl ciat uh hi. A tamzaw in zu le sa tawh leitung gualnopna-in bawl uh hi. Zu kham sa-in lamdung tengah awng uh hi. Pawlkhat gualnuam khengval uh ahih manin motor accident tam a, a si le a liam tampi mah om den hi.
Kawlgam ah Pu Henry Van Thio in Vice President hong sep hun-a kipan Yangon khuapi le Naypyitaw-te ah Lungdambawl suakta takin kibawl thei hi. Kumpi lam uliante in zong tha hong pia uh a, hong siim uh hi. Mailam hunah zong Tapidawte in kumpi le thunei ulian hong sep theih nadingin nakpi takin thungen lai ni.
Kawlte pongpong in pawi thupi sa uh hi. Tua pen Pasian’ naseem pawlkhat in na meetbawl thei uh hi. Lungdambawl ciangin milim bia Kawlte tampi sam uh a, anvak uh hi. An neek ma deuhin Zeisu’ hong gupkhiatna limtakin genkhia thei uh hi. Hih dan tawh Pasian’ naseem a lawhcing tampi mah om a, pahtaak huai mahmah hi.
4. Tedim ah Lungdambawlzia
Rev.Hau Lian Kham in 1971 kum pan kum simin Lungdambawl kuan ciangin Tedim khuapi sung veeng 4 ah nitak mi’ lup kuan 10:00 Pm pawlin awliatna tawh Christmas Message tangkona nei den hi. Ke’n zong ka zui thei zel a, battery ka puakna ah ka puanteen’ tungah acid tui tusak kha ka hih manin ka puanteen’ vang zihziah hi. Sakollam veeng sungah Laipian huang gei le No.1 BEHS sangpi gei-a phuitong kung gei pan, Myoma veeng sungah Meiphelh tausang tung pan, Lawibual veeng sungah zato mual pan le No.2 BEHS sang gei mual pan, Leilum veeng sungah nailung zialna innpi gei pan cih bangin tangkona nei den hi. Hih tangkona a za mite in lupna tung pan, mei awinamun pan, lampai laitakte in zong tawmvei sung din’ sa, cih bangin ki-apna nei-in, Zeisu sang uh hi.
Ka neu lai-in Lungdambawl hong tun’ kal ding ngaklah lua kisa-in ni bangzahin kisam lai, cih ka tuattuat zawzen hi. Tua hun lai-in tuhun danin mikim in sa kine zo mengmeng lo a, khuado le Lungdambawl ciang bekin sa a kine hi bek hi. Tua ahih manin Lungdambawl hong tun’ ding kingaklah ciat hi. Ko Sakollam veengte in Lungdambawl pen Upa Khen Dote’ inn vive ah ka bawl uh hi. Innteekte thunuam mahmah uh hi. December 24 zan le 25 zan a kizomin zan ka hak uh a, gualnopna tuamtuam ka bawl uh hi.
1970 ma ciangciang Zomi Tapidawte’ Lungdambawl dawnzia i et ciangin leitung pawi danin kingaihsun pian a, neek le dawn, le gualnop lam kithupi sak tawh kibang ka sa hi. Neek le dawn a ginat leh, “Tukum Lungdam zo ung ei,” kici a, neek le dawn a ginat kei leh, “Tukum lungdam zo tak kei ung,” kici hi.
Kei’ neulai bangin Lungdambawl taktak sangin Lungdambawl singpuak bang nuam kisa pen lai hi. Motor tawh Hawp ah singluang kipua hi. Ciahlam teh motor dimin phuitong paak kisuang zihziah a, Saimual suah-a kipan aw neihzah tawh awngin la kisa ziahziah hi. Gualnuam lua kisa-in a suak Zeisu nangawn kiphawk kha lo thei hi. Kumkhat motor tawh Lungdambawl sing puak ding lawp lua-in zan bang ka ihmu thei kei liang hi. Tua hun lai-in nungak leh tangvalte in kikholhna dan khatin nei uha, ko naupangte dongkholh hong sa simsim uh hi. Lawp takin motor tung ka kah vial uh leh tangvalte in hong kumkik sak uh ahih manin khasia-in ka khitui bang uh luang keei hi. Tua laitakin Mandalay University sang naupang Sia Hang Khan Mang, sangkhak sung innlam hong ciah zong hong kihel a, amah in, “Naupangte kumsak zenzen kei un. Ei zong amau gual ihih lai-in hih mah i lawppen hilo ihi hiam. Naupangte motor tung hong kahkik,” hong cih ciangin kuamah pau ngamlo a, ko zong lungdam takin ka kahkik ngeingai uh hi. Tua hangin tu dong mah Sia Hang Mang ka it tuam lai hi.
Zogam ah kha khan’lawhna lianpi hong tun’ 1970 kum pawl pan Lungdambawl dawnzia khat hong kilamdang pian hi. Neek le dawn, gualnopna cihte kithupi ngaihsut nawnlo hi. Taksa gilvah ding sangin khalam gilvah ding thupi kisa zaw ciat hi. Lungdambawl ni-in lungsim takpi tawh Topa’ tung lungdam kohna le ki-apthakna cihte kinei ciat hi. Kilungdam takpi ciat hi.
1990 pawl ciangin mi pawlkhat in, “Lai Siangtho sungah Lungdambawl cih limlim om kei, Israel gamah December kha-in tuu kicing ngei kei, Zeisu’ suahni zong December 25 hi kei, hih pen RC Pope in a phuahtawm hi,” cih hong nak gen mahmah uh hi. Tua hun pawl-a kipan Tedim gam sungah Lungdambawl kipeeng ngaihsut a, nidang zahin kilawp nawnlo hi. Leitung pawi dan lel khatin kingaihsun a, kihah bawl lua nawnlo hi. Pawlpi bup tawh bawlkhawm lo-in, amau’inn ciatah a bawl khawng zong om ta hi. “A suahni thupi lo a, a suakpa thupi zaw hi.” kici hi.
5. Lungdam bawl a thupi ngaihsut galkapmangpa
Galpi nihna lai-in US galkapmang General Douglas Mac Arthur (1880-1964) in Philippines tuikulh ah Japante lel ahih manin USA ah ciahkik hi. March 11, 1942 ni-in Philippines a nusiat ding ciangin, “I shall return” (Kong paikik ding hi) ci-in kamciam pia hi. Tua in gallelin Japante a kihta Philipino mite khamuangsak tuam hi. Tua zawh kum 2 khit October 17, 1944 ni ciangin Philippines ah va tungkik takpi hi. Ni 4 sung bekbekin Japante’ galvanleeng pua tembawpi 4, galsim tembawpi 3, galsim tembaw cruiser 10, tembaw a susia thei tembaw 11 suksiat sak hi. Japan galkap 11000 bang that a, Japante zo thal mang hi.
Amah pen US Army Force Far East, Philippines ah a makai US Field Marshall le Five Star General khat ahi hi. Galpi masa, galpi nihna, le 1950 kum Korean gal cihte ah gal do kha hi. Amah le amah Joshua tawh kigenteh a, “Pasian in Joshua a ziatlam khut pan lenin sih theih nading pan a hotkhiat mah bangin kei zong sih theih nading pan tam veipi mah hong honkhia hi,” ci-in teci pang hi. Amah in Lungdambawl thupi ngaihsut a, a omna peuhah a galkapte Lungdambawl bawlpih tangtang hi.
Sanggam, nang Lungdambawl koici dawn?
Source: Zangkong Awging Dec/2019

LUNGDAMBAWL MASA A KHAHSUAH MITE 
Bawlung suihna ah penalty sui-in khum kei lehang na mahmah hi. Zawh nading-a hunhoih, hunmanpha mahmah khat a kikhahsuah suak hi. Sangnaupang khat lai thupi mahmah a kisin ni-in cina- in sangkah zo kei leh sumh mahmah hi. Cina-in laivuan zo kei leh sumhzaw lai hi. Kum khat a sangkahna man neilo bang phial hi. Na manpha khat, hamphatna lian khat i khahsuah ciangin kisumh mahmah a, tua hamphatna zong kingahkik nawnlo thei hi.
Tuma kum 2000 lai-in mi pawlkhat in leitung a hamphatna lianpen, na manpha pen na khahsuah kha uh hi. Kumpite’ Kumpi, topate’ Topa suahna hoih tak a dawn thei ding kimlai na dawn khalo uh hi. Tua mite kua hi-a, bang hangin tua hamphatna khahsuah kha uh hiam, cih kikum leng i ut hi.
1. Zinbuk neipa:
A masa-in, Bethlehem khua a zinbuk neipa thu kikum ni. Hih pa a min kigen lo hi. A beh a phung zong kigen lo hi. Pasian um maw, um lo cihte ahi zongin, mihoih maw, misia cihte ahi zongin, kigen lo hi. Zawma gambup ah mi kisimna a om ding ciangin a suak dek mahmah Mazih, a pasal Zawtah tawh a khua uh Nazareth panin a taangkhua uh Bethlehem ah hong pai uh hi. Hih pen Lai Siangtho lui, Micah 5:2 a tangtun’ nading ahi hi. Nazareth le Bethlehem tai 80 bang kigamla hi. Mazih naupaai ahih manin midangte bangin nawh pai theilo uh hi ding hi ven Bethlehem khua a zinbuk a tun’ uh ciangin amau tun’ nading innkhan (inndei) na om nawnlo hi. Zan ciangin nau suak a, a sial nading uh mundang om tuanlo ahih manin bawng an neekna kuang sungah nau sial uh hi. Hih lai ah zinbuk neipa in zin hau hi ding hiam, buai mahmah hileh kilawm hi. Mazih le Zawtahte don man pha lo hi. Mazih pena gilpi tawh a khualzinna gimin vul ningniang kha ngel ding hi. A meel muh ziau bek tawh zong hehpih mahmah leng kilawm hi. Ahi zongin zinbuk neipa buailua ahih manin Mazihte nupa phawk man pha lo, awlmawh man pha lo hi. Buailua kei hen la, Mazih hehpihin inndei nuam khat bang vaihawmsak hileh leitung hon dingpa hoih tak-a a dawnkha, zin a dokha suakin, mi hamphapen khat suak ding hi. A buailuatna hangin tua hamphatna a khahsuah kha suak hi.
Tu ni-in zong mi tampite leitung vai tawh buailua mahmah uh ahih manin Topa Zeisu don manlo uh hi. Pawlkhatte sum zongin buai uh hi. Pawlkhatte pilna zon’na tawh buai- in, pawlkhatte kumpi nasepna ahi zongin, nasepna tuamtuam tawh buai uh hi. Pawlkhatte minthan’na le zaaliatna zongin buai cihtakin buai uh hi. Pasian hun pia man peuhmah lo uh hi. Bethlehem khua a zinbuk neipa bangin hih mite zong mi hoihlo cih hituan lo hi. Misuam, mi that, guta buluh cih banghilo uh hi. Leitung vai tawh buailua uh hiziau lel hi. Mawhna lian pipi bawl man hi lo-in, buailuat man bekbek-a Zeisu don manlo-a hell sung tung mi tampi om ding hi. Sanggam, nang tu niin, na buailuat manin Zeisu na nawlkhin kha hiam? Leitung vai khempeuh sangin Zeisu thupizaw hi. Tu ni-in Zeisu na nuntakna sungah mun pia in la, na Honpa-in sang in. Piangthak sa thu-umte in zong buaina tuamtuam hangin Pasian thu kinunun’ kha thei hi. Buailua ihih manin thungen-a Lai Siangtho simna tawh Pasian tawh hun zat ding nangawn kinusia thei hi. Sanggam, Pasian tawh holim ding sang-a thupizaw leitung ah vai omlo hi. Mi pawlkhat in, “Kibuai lua mahmah in thu kingen man lo,” ci thei uh hi. Ahi zongin, Pasian’ naseem minthang Bill Hybel in, “Buailua ka hih manin thu ka nget loh phamawh,” cizaw hi. Tu ni-in i nuntakna ah Pasian gam le Ama’ dikna zong masa ni. Tua hi leh i vai khempeuh Ama’n tavuan hong la ding hi. Bethlehem khua-a zinbuk neipa bangin buailuatna tawh Topa don ding mangngilh kha kei ni.
2. Hezoh kumpipa:
A nihna ah, Hezoh kumpipa thu gen lehang. Matthew 2 sung-a kigen Hezoh pen Topa Zeisu suah laitak-a Judah kumpi a seem Herod the Great ahi hi. Esau’ suan, Edomite minam, a gilo, a gamhtat mahmah mikhat ahi hi. Zi 10 le ta 12 nei hi. Miriamne kici a zi le a tate nih that hi. A sih madeuhin a tapa Antipater zong that hi. Herod gitlohna a kigen ciangin,”Hezoh’ ta hih ding sangin Hezoh’ vok hih ding ut huaizaw hi,” kici liang hi. A meet nadingte ah lah mi mai-et siam mahmah a, Zawma kumpipa in Judah gamkee kumpi ding-a a koih ahi hi. A gitloh lam amah le amah zong kithei-in a sihni teh kuamah kap hetlo ding cih thei hi. Tua ahih manin a sihni teh mi kap a om theih nadingin mipil, migina tam simsim thongah koihin, ama’ sihni teh tua mite thah dingin vaikhak khol hi. Tua mipil teng kithat leh a kap om ding a, ama’ sih a kah tawh kibang ding, cih a deihna hita lawmlawm hi. Hezoh in Zeisu suak cih a zak ciangin lau-in patau hi (Mt.2:3). Ama’ kumpi zaa a tuh ding patau hi. Amah bek mah kumpi hi nuam hi. Tua ahih manin naungek Zeisu a thah theih nading, ahih theih tawpin hanciam hi. Bethlehem khua le a kim -a om naupang kum nih nuaisiah a muh zahzah thatsak hi. Hih pen ama’ pian’zia i theih ciangin lamdang hetlo hi. A gilo ahih banah kumpi zaa a kiat ding a lau luat man ahi hi.
Tu ni-in zong mi tampi in amau’ nuntakna sungah kumpi seem nuam uh hi. Amau le amau bek ki-uk nuam uh hi. To deihlo uh hi. Suakta takin amau’ ut bangbangin gamta nuam uh hi. Mawhna sungah zu le sa leh thangtatna namkim tawh kidiah nuam uh hi. Thumaan lo, a kilawmlo lampi tawh sum zongin minthan’na zong nuam uh hi. Zeisu Honpa le Topa-in sang le-uh, Zeisu’ deih bang-a nuntak kul ding ahih manin Zeisu sang nuamlo uh hi. Luke 18:18-30 sung-a kigen a hau ulianpa in zong Zeisu’ sawl bang mang nuam lo-in, Zeisu na nial hi. Sanggam, nang tu ni’n Zeisu na Honpa le Topa -in na sang nuam hiam? Ahih kei leh, nang le nang mah to-in kinei-in siatna lam mah manawhin, na paipai lai ding hiam? Hezoh bangin zaakiat ding launa tawh Zeisu na nial leh Hezoh’ paina lampi mah na tot kul ding hi. Tu ni-in hong kihei in la, Zeisu sang in. Zeisu san’na ah supna omlo bek tham lo-in meetna le thupha om hi.
3. Siampite le laitheite:
A thumna ah siampite le laitheite’ thu tawm gen ni. Zeisu’ suahna tawh kisai Hezoh in siampite le laitheite a dot ciangin, “Bethlehem khua-ah suak ding hi,” ci-in Lai Siangtho tungtawnin gen uh hi. Hih mite in Lai Siangtho thei mahmah uh hi. Mawsi’ thukham zong tel mahmah uh hi. Thukham zui zo kisa-in amau le amau zong hoih kisa uh hi. Midangte bang neuet uh hi. Amau’ hoihna tawh Pasian mai zon’ sawm uh hi. Tua ahih manin, Zeisu Bethlehem ah suak ding, cih thei napi uh awlmawh lo uh hi. Kan sawm lo, uh hi. Pai-in va biak sawmlo uh hi. Zeisu in na a sep ciangin zong hih mite mah in langpan’ den uh hi. A tawpna ah Zeisu kithah nadingin hih mite mah in vaihawm uh hi. Tu ni-in zong mi tampite amau le amau hoih kisa uh hi. A gamtatna peuh uh suangin vantung tun’ sawm uh hi. A Lai Siangtho theihna peuh uh suang uh hi. Tuma kum 40 val lai, kha khan’lawhna hong tun’ cil lai-in mikhat in, “Lai Siangthobup vial 30 val vei sim khin ing,” ci-in pianthakna thu nial vetse hi. A Lai Siangtho tam simna suangin Zeisu nial kha hi. Sanggam, nang tu ni-in, nang’ hoihna, nang’ Pasian’ thu theihna peuh suangin Zeisu na nialkha hiam? Topa Zeisu’ suah lai-a siampite le laitheite tawh na kibat khak ding lauhuai hi.
4. Jerusalem khua mite:
A lina ah Jerusalem khua mite en leuleu dih ni. Topa Zeisu’ suahna Bethlehem khua le Jerusalem khuapi pen tai 5 khawng bek kigamla hi. Jerusalem pen Israelte’ khuapi ahih banah biakna phualpi ahi hi. Kum tawn kha tawnin biakna pawi tuamtuam kibawl den hi. Gangawh biakna zong kibawl den hi. Khua tuamtuam pan Jerusalem a biakpiakna pia ding-a pai mi pen kipha mat den hi. Biakna thu tawh a buaiden khua khat ahi hi. Jerusalem khuamite in Zeisu suahna thu za kha lua ding uh hi. Ahi zongin biakna pawi tuamtuam tawh buai uh ahih manin awlmawh lo uh hi. Thudon manlo uh hi. Bethlehem le Jerusalem kinai ngel ci leng, kuamah Zeisu suah en dingin pailo uh hi. Zeisu in na a sep ciangin zong Jerusalem khua mite in awlmawh lo bek lo-in langpan’ uh hi. Topa Zeisu in a kithah ma deuhin Jerusalem khua adingin tamlo-in kap hi (Mt.23:37).
Tu hunin zong mi tampite biakna thu tawh buai sim zawzen uh hi. Antan’ thunget cih mah, inn kikhop cih mah, nupi teng, papi teng kilawmtakna cih mah, lasin cihmah, lawmbawm khawm cih mah, a tuamtuam tawh buai theimahmah uh hi. Ahi zongin tua bang-a biakna thu, pawlpi thu a buaipih mi tampi takte piangthak hetlo uh hi. Zeisu neilo uh hi. Tua bang hanciamna teng tawh vantung a tung ding peuh a kisa lai mi pawlkhat om mawk hi. Sanggam, biakna vai, pawlpi vai buaipihin, Zeisu peuh na don kei kha hiam? Biakna hanciamna in vantung hong tun’lo ding a, Zeisu bek in vantung hong tun’ ding hi (Jn.14:6).
5. Nazareth khua mite:
A ngana ah Nazareth khua mite thu kikum dih ni. Nazareth khua pen Topa Zeisu khan’khiatna khua ahi hi. Ahi zongin tua hun lai-in Nazareth khua pen kineumuh mahmah hi. A mite zong haitatin khuapi vailo uh hi. Zawma galkap honpi khat om ahih manin numei-pasal vai ah thangtatna zong tam hi. Lai Siangtho umlo pawlkhat in Zeisu pen Mazih le Zawma galkap khat’ zawlta hi, a cih uh pen hih thu hang ahi hi. Nazareth khua kineu muhlua ahih manin Nathaniel bang in, “Nazareth pan zawzenin nahoih piang thei ding hiam?” na ci hi (Jn.1:46). Nazareth khuamite in Zeisu’ thu tellua mahmah uh ahih manin sang nuamlo uh hi. A nu a pa, a sanggam te, a nasep uh, a nuntakzia uh tellua uh ahih manin Zeisu up hak sa uh hi. Tua ahih manin, Topa Zeisu in tua khua ah nalamdang tampi bawl lo hi (Mk.6:1-6).
Tuhun teh zong mi tampi in Tapidaw thu,biakna thu, Pasian’ naseemte’ thu mu-in tellua mahmah uh ahih manin Zeisu niallawh thei uh hi. Pian’thakna thu a kigen cil lai-in papiuhaam zawdeuh pawlkhat bang in, “Ke’n Cope topa lap ing; kei Sia Vial Nang’ tuiphum hi’ng,” peuh ci-in biakna sung-a a tualbial luatna teng uh tawh gupna thu nialkha uh hi. Mi pawlkhat a neu tung-a kipan Sunday School ah kipantahin, biakna sungah khangkhia lua uh ahih manin pian’thakna khawng thusim lo zawsop uh hi. Biakna thu a tungtham tengah nalgawpin a laingek a sukha lo mi tampi om hi. Biakna thu telna, nalgawp pongmawkna tawh vantung a kitung hi lo-in Zeisu san’na bek tawh vantung kitung ding ahi hi.
6. Zawma mite:
A gukna ah Zawma mite en ni. Zawma khua pen taang khuapi teng lakah a thupipen khat ahi hi. Zawma khua tawh kisai pauciin’ le paunak zong tampi om hi. Gentehna-in, “Zawma khua ah na om leh Zawma mite bangin om in,” cihte; “Lampi lian khempeuh Zawma khua tung hi,” cihte; “Zawma khua nikhat sung-a kilam hilo hi,” cihte kizang mahmah hi.
BC 75 kumin Zawma khuapi ah mi awn 4 om hi ci-in ciaptehna om hi. Zawma mite pen milim biate ahi uh hi. Zawma khuapi sung bekbek ah milim biakinn 420 om hi. A nungta Pasian peuhmah phawkkha lo uh hi. Gualnopna zong a ut deuhte ahi hi. Zawma khua leitang’ 1/8 pen paak-huanin kizang hi. Kum khatin zumkhak ni 159 om hi. Kumlang khawng bek na kiseem cihna ahi hi. Kumpi sum tawh kibawl kimawlna tuamtuam nam 93 om hi. Mi 250000 tut theihna kimawlna tualpi khat om hi.Pawilahna inn lianpi tampi zong om lai hi. Zawma te in milim biakna le gualnopna hahbawl mahmah uh hi. Tua ahih manin amau’ ukna gam sung-a suak Zeisu mangmat kha beeklo uh hi.
Pasian in milim biakna pen a huatpen khat ahi hi. Tua banah, sing le suang tawh kibawl milim i biakloh hangin i nuntakna sungah milim tampi om thei hi. Pasian mai -a i koih na khat peuhpeuh pen i milim (idol) hi pah lel hi. Sum le paai i milim hi thei a, pilna zong i milim hi thei hi. Minthan’ nopna i milim hi thei a, zaaliat nopna zong i milim hi thei hi. I nuntakna sung-a milimte le gualnopnate in Zeisu i san’ ding hong dal thei hi. I milimte le thangtat nopna lungsimte hemkhia-in Zeisu i san’ ciat ding i kihanthawn nuam hi.
 (Siapipa’ Sermon Vol.II pp.232-234 pankila hi. Ed.)
Source:Zangkongawging Dec/2019

ZU’ BAWLIN MIHING IN GANHING LUNGSIM KINEI THEI Dr.Thomas Sian Za Kham M.B;B.S;D.A;M.A (Theo) Sama-875
Zuneek a hoihlohna mikim in theih tek ding gen nuam ing. Leitung ah neektheih khat peuhpeuh pen a val lua-in neek ding, dawn ding hoihlo hi. An neek ciangin zong a hoih bek ciang khat neek ding, lim tah, ci-in hamzial ding hoihlo hi. Tua mah bangin zu zong a neeksiamte’ adingin pumpi cidam nadingin hoih thei kha ding hi. Ahi zongin khua phawklo zen a, neekna in cidam lohna, khan’tomna piangsak hi. A hoih pen in zu-a kipan khamtheihguihtheih a kici pongpong va su kha kei vet le’ng hoihpen hi.
Zunete in a nuai-a bangin ganhing lungsim nei thei uh hi.
1. Utong lungsim:
Zu a khauh sim ngel khat a dawn cil, kam khat, kam nih a valh khit teh a ne pa/nu pen mi kamtawm ngel khat hita leh hong kamtam pian pah, amah le amah hoih kisa pian, hau kisa pian, maingal, kiphat nuam pian pah hi. I Zola khat in hong lak hi. (a) Ningzu ne, theisen gual lai-ah hau ta mang pian e, khua kah ngai lo e. (b) Hauta mang pian e, khua kah ngai lo e, sesum phung cing e, Zolei lawm tang thot kah ngai lo e. A khiatna: (a) Zu ne a, ka lawm ka gual tawh ka om ciangin a hau ka kisa a, khua tang ka phawk kei hi. (b) Sum zong ka nei lel a, lokho, thacial cih bang zong ka awlmawh kei hi. Utong pen vasa lakah a hoih bel khata kiciamteh hi a, amah le amah zong hoih kisa-in, a meibawl zal dada-in om thei hi. Tua mah bangin zu’ sawlin mihingte in zong hih vasa tawh kiteh thei hi.
2. Zawng lungsim:
Zu kamkhat, kam nih bek hilo a, hai khat ciang bang a neek khit teh a nepa/nu in zawng lungsim hong paai ta hi. Ommawh, khut thak, a kiim a paam khoih nuamin, a kilawm loin a khut zang nuamta hi. A zumhuai mawhlo, khut tawh zawtna mun cih bang hong nei toto hi.
3. Sahang lungsim:
Zu neek teh ciangtan om nawnlo, a tam toto kine nuam tektek ahih manin zawng lungsim panin sahang lungsim hong nei to ta hi. Khut thak bek hi nawn lo-in gitloh, satloh ding, hehhuai lopi khat zong heh lak, mi lai ding, kitom ding cihte hong tam ta hi. Mi lai ding bek hi lo, mi thah nopna lungsim nangawn hong nei ta ahih manin tua sahang lungsim hangin mi kithahna ciang dong hong tungto thei hi.
4. Vokpi lungsim:
Leitung ganhing khempeuh lak panin vok a siangtho lo pen ci leng kikhial lo ding hi. Vok khat lim takin tui tawh silsiangin koih leng, thakhatin tai vingvengin buan lakah a bual ngei-in va bual lian lel ding hi. Hih pen vok kici ganhing namte’ pianzia hi a, a nuntak lai teng a tua ci denden lel ding ahi hi. Vok bek hilo mihingte’n zong zu nakpi takin i kham hun ciangin vok bang mahin buan lak ah kidiah gawp thei ahih manin zu’ bawlin mihing lungsim vok lungsim tawh kibang thei cih a nuai-a bangin kikum ni.
Zu pen i neek ciangin kham khatna, kham nihna, kham thumna ci-in kikhen thei hi. Kham lina ciangin vok lungsim kipaai ta a, bangmah awlmawh nawn loin leivui, buanciim lakah kidiah gawpin, khuataang phawk vet lo, bangmah thei nawn lo-in ki-om a, a zukham a phat ciangin amah le amah koi lai-ah om, cih kithei pan hi.
Lai Siangtho Pian.9:20,21 sungah kipulak masapen ahi hi. 1Tim. 5:23 “Na gil sunga natna hang leh na nat mun zelzelna hangin tui bek zang nawn loin leenggahzu tawmtawm na zang in,” ci hi. Hih Lai Siangtho sungah leenggahzu (wine) tawmtawm ne ding bek ci hi. Eph. 5:18 “Zu in mi siasak thei ahih manin zu ne kei un la, Kha Siangtho tawh kidimin om zaw un,” ci hi.
Lai Siangtho sungah i theih mah bangin leenggahzu ciang neek ding pen tam ne lua kei peuh leng a kizang ahih lam kimu hi. Pau. 20:1 Zukhamna pen haina ahi hi. Isaiah 28:7 Siampite le kamsangte nangawn in zu khamin hoi uh hi. Zukham a hoihlohna pen Lai Siangtho sung hita leh leitung thu mahmah panin zong tampi tak kimu ahih manin ahih theih laiteng a kuamah peuh in zat vetloh ding hoih hi. Pau. 16:32 ah “Khuapi khat i uk zo kei phial zongin, eimah ki-ukzawhna nei peuh leng hih a tung-a i gensa ganhing nam (4) te’ lungsim tawh kibang lo sam ding hi hang, cih ciapteh huai hi. Hih lai a simkha a kuamah peuh i biak Topa Pasian in thupha ong pia ta hen.
(Siavuanpa pen zato siavuanpi, laigelh siam, thu le la a kiva mipil khat hi. Ed.)
Source:Zangkongawging

Hih pawlpi pen beem (Zero) sang a niamzaw lai, a dawhkhiatna (Minus) tawh kipan pawlpi hi. Topa in kum (32) sung tawntung hong tonpih ahih manin Topa’ min ka phat hi. Kum (32) sung thungetna tawh ahi zongin, piakkhiatna tawh ahi zongin, lampi khatpeuh tawh a kihel mite khempeuh tungah thupha om ta hen.
Zogam ah ka om lai-in Yangon ah pawlpi kipan ding, cih ka gen teh kuamah in hong uppih lo uh hi. Pawlpi upate in “Sum bangzah nei a, kipat sawm nahi hiam? hong ci uh hi. Zogam ah hong kiit ahih manin Yangon pai ding kuamah in hong phal lo uh hi. Sum Ks. 10000/- leitawi-in tua tawh Yangon ka zuansuk uh hi. Mandalay ah nipi kal khat sung thugenna ka neih sungin kumpite in 75, 35, 25 dangkalaite sisak ahih manin ka sum leitawi teng laidal mawkmawk hong suak hiau hi. Ka lungsim sungah hih ka vision pen Topa’ kiang pan hilo ahi tam, cih khawng zong ka ngaihsun man hi. Yangon ah pawlpi mi 10000 nei ding cih ka gen ciangin Zogam-a ka Pasian’ nasepih teng, tanau teng in, “Huih lakah taihinn lam sawm nahi hiam? hong ci ciat uh hi. Mi tampite in vision nei sam uh hi. Ahi zongin mite in tha a piakloh uh ciangin tua a vision khiam thei uh hi. Kei tha hong pia omlo, hong huh le hong panpih zong omlo hi. Ka leiba Ks. 10000/- teng bangci lohkik ding cih ka lung buai man hi. Pasian pen lungsim tamzante, cih nading theilote, mailam ading lamet beite hong nusia lo hi. I nuntakna sungah khua hong mialkha zongin Pasian in tua khuamialpi teng hong vengsak a, lametna hong neisak hi.
Mate 16:18 ah Topa Zeisu in, “Hih suang tungah ka pawlpi ka lam ding hi. Hih pawlpi Hell kongkhakte in zo lo ding hi,” ci hi. Pasian in kei sungah lametna thak hong guan hi. Topa in “Hih suang tungah” cih kammal tam veipi tak hong gen hi. Tua suangpi in Zeisu Khazih ahi hi. Na dangte a kikhel phial zongin Zeisu kikhel ngeilo hi. Amah in mihingte’ kihtak lianpen ahi sihna zo-in thokik a, zanni, tuni, le a tawntungin kikhel lo hi. Pawlpi i cih pen suangpi ahi Zeisu sungah a kilam pawlpi ahih ding thupi hi.
Pawlpi pawlkhat pen tanau vai tawh a kiphut ahi hi. Hih dan pawlpite tanau vai mah tawh buaikik lel ding uh a, pawlpi sungah mimal kitelkhialhna tuamtuam hong om ding hi. Minam vai tawh a kiphut pawlpi pawlkhat zong om hi. Tua bang pawlpi cidam theilo, khangto theilo hi. Mi pawlkhat in pawlpi mi tam ding thupi sak uh hi. Pawlpi mi tam ding ut mah hi hang. Ahi zongin pawlpi mi tam mahmah napi, Zeisu a kihel loh sangin pawlpi mi a tawmhangin Zeisu a kihel ding thupi zaw hi. Mi pawlkhat in ko pawlpi sungah mihau tam kei, ci uh hi. Phamawh masa kei. Pawlpi sungah sum kisam mah hi. Sum a om hangin Zeisu om kei leh a mawknapi hi. Zeisu in, “Ke’n ka pawlpi sum tungah kilam ding hong ci ka hiam” hong ci hi. Sum a thupi hilo a, Zeisu a thupi hi zaw hi. Pawlkhat in ko pawlpi sungah pilna nei tam kei, ci thei uh hi. Pilna a thupi hi masa kei, Zeisu a thupi hi. Pawlkhat leuleu in ka pawlpi doctrine hoih hi, ci-in a pawlpi doctrine uh kisialhpih uh hi. Doctrine a hoih hangin Zeisu hong kihel kei leh a mawknapi hi ding hi. Zeisu a bulphuh pawlpi hih ding thupi hi. Sum a om kei zongin Zeisu om peuh leh pawlpi khangto lel hi.
Biakinn kong gei ah khutdawh ngen khat om hi. Amah in Pitazuh le Zawhang a muh ciangin sum pia dingin lamen ahih manin a mai uh ento hi. Pitazuh in, “Kham leh ngun ka nei kei uh hi. Ka neih uh Zeisu min tawh tho in la, kalsuan in,” a cih teh tua pa thakhatin damin kalsuan hi. Mite in lamdang sa ciat uh hi. Hih pa kua’ damsak hiam, ci-in kidong uh hi. Hua ngabengpa’ damsak hi, ci uh hi. Peter in, “Note in singlamteh tungah na thah uh Nazazet khuami Zeisu sihna pan thokik a, tua Zeisu’ min tawh damna a ngah hi,” ci uh hi. Tua ni-in mi 5000 piangthak uh hi.
Sum haksatna thuakin zanin ihmu thei lo-in ka lungkham mahmah laitakin Topa in,”Mungtawng aw, nang’ kisappenin sum hi masa kei, Kha Siangtho sathau nilhna hi,” ci-in hong hopih hi. Topa’ hong hopihna tu ni-in hong tangtung ahi hi. Tu ni-in eite’ kisappen in Kha Siangtho sathau nilhna hi. Kha Siangtho in sathau hong nilh khit ciangin Zeisu’ min tawh a kalsuan dingte ihi hi. Topa Zeisu in, “Mungtawng aw, ka pawlpi keima’n ka lam ding hi,” hong ci hi. Mi tampite in Pasian’ sep ding teng kisep sawm hi. Pasian’ nasep pen Pasian bek mah seemsak ni. E’n va seem kha kei ni. Tua Pasian’ nasepna ah Topa’n hong zat theih nadingin upna le thuman’na i neih ding kisam ahi hi. Pasian’ nasepna bek hi kei, sum le paai zon’na ah zong Topa’n na hong sepsak nak leh lawhcing ding nahi hi.
Hih pawlpi a kipat cil lai-in mi (5) tawh kipan ahi hi. Veeng sungah hong kideih lo hi. Kikhop kipat nading lasak phet leh suangtum pen guahzu hong bang ziahziah hi. Tua ahih manin nipi ni hong tun’ ding ka kihta hi. Nipi ni hong tun’ ciangin mi tampi hong kikhop ding ka ut hi. Ahi zongin ka lau hi. Topa in, “Na kiap cil lai-in Topa aw, hong it ing. Bangbang ka tuak zongin na na ka seem ding cilo nahi hiam? Bang hangin tu’n lau nahi hiam? Note ngiahon lak-a tuuno kikhah bangin kong khah hi,” hong cih ciangin ka launa teng hong bei ta hi. Topa aw, ka mawhna hong maisak in,” ci-in thu ka ngen hi. Topa in a naseem dingin hong sap takpi na hih leh haksatna om ta leh na lau kei ding a, na lung a kia tuan kei ding hi.
1987 kum Kanbe ah pawlpi kipat cil lai-in sumsih hun tawh kituak ahih manin nipi ni teh sumpi Ks. 100/- khawng bek kingah hi. Kanbe ah kiim le paam te’n suang tawh hong deng uh ahih manin tua in khuapi laizang ah biakinn neih ding hong lunggulh sak a, biakinn ding ka zong uh hi. Kha simin ni (10) sung an tangin thu ka ngen uh hi. Innsap sabaw 150000/ – piak ding hi a, sumpi 100/- ngah bek tawh piak zawh nading thubaih lo hi. Topa in a lamdang takin na hong seem a, inn hong sapsak zo mawk hi. Inn dawl ngana ah kikhop ciangin kuamah in suang tawh hong deng nawnlo hi. Mite’n hong simmawh leh i khan’toh nading, i zaa khan’ nading, i thupha ngah nading ahi hi. Suang tawh hong kideng lo bang hi leh tu ciang dong mah Kanbe mahah a ki-om lai meel zong kigen theilo hi. Mi (5) tawh i kipat pen Topa’ thupha tawh tu-in pawlpi mi 6000 val i pha ta hi. A sawt loin mi 10000 i pha ding hi. Hih dinmun ciang i tun’ theih nadingin ke’n bangmah seem thei tuanlo hi ing. Siama Niiang in zong bangmah seem thei tuanlo hi. Topa mah in hong seem hi a, Topa in a nasepna ah eiteng pen mong khat tek pan a kihel ihi bek hi.
Topa’ min tawh nasep khat peuhpeuh i kipat nak leh gensiatna, langpan’na cihte hong om ding hi. Tua bang hun ciangin lau kei in. Kha Siangtho in tha hong guan ding hi. Hong hehnem ding hi. Lampi thak hong hon’sak ding hi. Mi pawlkhat in Full Gospel Assembly pawlpi pen “Sia Mungtawng’ pawlpi, Siama Niiang pawlpi” ci uh hi. Hih pen maanlo hi. Hih pawlpi a nei pen Zeisu hi. Pawlpi lutang in Sia Mungtawng hilo a, Zeisu’ ahi hi. Bang hang hiam cih leh hih pawlpi pen Zeisu in a sisan tawh a lei hi. Ke’n hih pawlpi’ adingin ka sisan mal khat zong bua lo hi ing. Hih pawlpi pen Zeisu tungah a kilam pawlpi, Zeisu mahmah in a phuh pawlpi ahi hi. Nikhat ni ciangin Zeisu a pawlpi la dingin hong paikik ding hi.
Pasian in pawlpi thupha hong pia a, nipi ni ciangin biakpiak hun (4) vei kinei ta hi. Biakpiak hun khempeuh ah kikhawm mi kidim zihziah den hi. Topa’ thupha tawh i biakinn hong neu ta hi. Mailam ah Topa in hih sangin hong khangtosak zaw lai ding hi. Topa’n Thanlyin ah huangpi khat hong pia hi. Camp le thusinna tuamtuam ah kizang a, lem mahmah hi. Topa’n Yangon khuapi laizang ah biakinn golpi khat hong piak lai nadingin thungen lai ni. Engineer siamte design suaisakin biakinnpi khat i lam ding a, tua sungah sai tuamtuam khawng zong i koih ding hi. Khangnote’ ading, naupangte’ ading khan (Room) tuamtuam i koih zihziah ding hi.
Hih pawlpi a phut pen Zeisu hi. Hih pawlpi a nei pen Zeisu hi. Hih pawlpi pen Zeisu tungah a kinga pawlpi hi. Tua ahih manin pawlpi birthday ni-in Zeisu pahtawi ni. Zeisu bek mah liansak ni.
(14.9.2019 FGA pawlpi kum (32) cin’ birthday ah Rev.Dr. Dam Suan Mungthuhilhna Kawlpau pan kila hi. Ed.) Source:Zangkongawging Oct/2019