Zomite nuntak khuasakna sungah tanglai pek a kipan Siampite pen Hausate le siksekte zahin thupi mahmah uh hi. A nungta Pasian’ thu i san a kipan siampite’ nasep pen Pastorten hong zomto uh hi. Pastorte nasep tampi lakah Lungdamnathu gen pen Vakkawnsia(Evengalist)ten hong zomto uh hi. Pastorte le Vakkawn Siaten mipite lungsim sungah zahtakna a ngah bangun amau omzia tatziate mipiten kizui sim pian gige hi. Pasian’ nasem pawlkhat in Pulpit tung pan iPad, Cellphone cihte pan Lai Siangtho hong sim uh pen mipi lam pan muhna nam nih om hi. Kilawm a saten siksan nei uh a, kilawm a sa loten zong siksan mah nei uh hi. Hih thu tawh kizui-in dinmun khat i letkip theih nadingin a nuai a bangin muhna i gual nuam hi.
1. Lai Siangtho koici bangin hong piang hiam?
Lai Siangtho a bu tawh i neih theih nadingin Computer sung mahah kikhen masa ahih manin tua a kizang Computer sungah bang teng kikem cih kithei lo a, iPad le Cellphone pan i zat tawh kilamdang lo hi, cih ngaihsutna nei uh hi. IPad le Cellphone sung pan Lai Siangtho sim ding i san zawh kei leh a laibu tawh i sim zong san zawh huai tuan lo a, a kigelh masakna (Original) pan i sim ding hi. IPad le Cellphone pan Lai Siangtho sung i zon nop khatpeuh olno takin kizong ziau thei hi, ci uh hi. IPad le Cellphone pan laibu deih bangbang kisim thei a, laibusalpi (Library) a nei kisuak pah hi. IPad le Cell phone sung pan i sim hangin a thu Pasian’ kammal a kibang veve hi, ci uh hi.
2. Lai Siangtho a laibu ngiat tawh sim ding a pomte dinmun
Lai Siangtho i cih Mikang pau-in Holy Bible kici a, Greek kammal “biblion” hi-in a khiatna pen laibu aihkeh laizial cihna ahih manin a laibu mah tawh sim ding ciin kammal bulpi (root meaning) dinpih uh hi. Lai Siangtho a kigelh masakna tawh i sim nop hangin kingah zo nawn lo a, laibu tawh deih hunhunin kingah thei lai ahih manin laibu tawh sim tangtang ding thupi sa uh hi.
IPad le Cellphone hong pian ma Lungdamnathu tangko-in pai kawikawina ah Lai Siangtho bek hi lo zanpuan puangiatngiat a khe tawh a pai ciatciat zo, Pasian’ nasemten khe tawh pai a tam nawn lo khuahun le Zanpuan puak a kul nawn lo khang hunah Lai Siangtho pen vangik hi lo hi, ci-in telmuh uh hi.
Pulpit tung le mipi mai-ah Laibusal sung a om laibute sim kawmin thu kigen hi lo a, sim ding teng le kigin ding teng kigin phitphet khit teh Pasian muanna tawh ki-ap a thu kigen ahih manin Pulpit tungah Laibusal (Library) zong a om pah iPad le Cellphone pen zat ding kisam tuan lo hi, ci-in telcian uh hi.
Pasian kammal a sim i hih hangin i simna iPad le Cellphone pen muhhuai lo pawlkhat muhkhakna (YouTube, Facebook, Twitter, Instagram.,etc) le genhuai lo thu genkhiatna (Phone pan mite kammal kilawm lo tawh kiko gawp thei) ahih manin Lai Siangtho a bu mah tawh sim ciatciat pen lungkimhuai diak a hihna dinpih uh hi.
3. Banghangin IPad le Cellphone pan Pasian kammal kisim?
IPad, Cellphone le Lai Siangtho koikoi zang tale’ng i sim thu kibang hi, ci-in a pom man ahi hi. Pawlkhat in Lai Siangtho a bu-in (nei lo) pua kha lo ahih man hi. Pawlkhat in a lungsim kiu khatah kisialhnopna hang (a nei cilte) zong hi thei hi. Pawlkhat in iPad le Cell phone pan Lai Siangtho simna hangin mipin a pimuh dingin a ngaihsut man zong hi thei hi.
4. Bang hunah IPad le Cellphone pan Pasian’ kammal sim ding?
Biakna suahtakna om loin Lai Siangtho bu puak kawikawi ding hong kikham hun teh iPad le Cellphone sungah i koih pen manpha mahmah ding a, tua bang hun teh iPad le Cellphone mah i zat kul ding hi.
Pawlkhatten Khawmpite ah thu a gen ding uh teh Lai Siangtho a bu mah pan sim tanghtangh napi, adangdangah iPad le Cellphone panin tangzang takin sim ziau uh hi. Ahi zong Innkuan kikhop, Homecells kikhop, nasepihte tawh tha lakkhopna (devotion), inn thungetna, Biakinn kikhopna le Biakna pawi thupi (Khawmpi) cih a mun a mual khentuam loin a thu tungah kinga a i zat suak sawm leh IPad le Cellphone pan Pasian kammal Lai Siangtho pen teelzawkna tawh kisim thei lel ding hi.
5. Ngaihsutpiakna
Mipi muhna ah Lai Siangtho a bu tawh i sim pen a sang zo lo om lo a, IPad le Cellphone pan Lai Siangtho i sim pen kisang kim zo lo ahih manin Lai Siangtho a bu mah pan i sim tanghtangh pen thungai mipite lungsim zawhsa hi pah hi.
Lai Siangtho pen a bu mah tawh Gospel paina ah i puak kei leh a dam phalo / hat nawn lo hi’n teh ci thei kha ding uh hi. Siapa/nu pen zanpuan pua a, Gospel a pai lai dinmun lui mangngilh ta, ci thei kha ding uh hi. Pasian in na khempeuh thei ahih hangin Vantunggamah a lut thei dingte min Tuuno laibu sungah kigelh a, thukhen ni teh tua Tuuno laibu kilem ding, ci tektek hi. Laibu tawh i sim pen zekai ta hi loin ni tawp ni dong kizang ding hih tuak hi. Mangmuhna sungah Nuntakna laibu cih pen 31 vei kigelh hi.
Lai Siangtho kammal pen iPad le Cellphone pan i sim manin iPad Siangtho, Cellphone Siangtho i cih tawm vat hangin leitung in hong sansak nai lo a, Lai Siangtho (Holy Bible) mah leitung in hong ciaptehsak (Universal acceptance) lai hi. Nov.26-29, 2018 sungin Kawlpi a kibawl (Siadaw huang le AMC Biakinn) 4 veina Global Zomi Alliance khawmpi lai-in Tapidaw biakna pawl tuamtuam pan Makai Siapiten thugenna nei uh a, Lai Siangtho a bu mah tawh hong simpih uh hi.
Feb.20,1986 ni-in Leipi Tuiphum Pawlmi Pa Tual Khaw Tuan’ inn meikang a, lamdang takin Lai Siangtho bu kang lo hi, ci-in a tunu Lia Man Deih Cing in gen kik a, iPad le Cellphone tha thunna (Battery charge) panin a puakkham theihna tawh i tehkak teh Lai Siangtho a bu mah tawh sim pen lungkimhuai lai hi. Nov.10, 2002 (Nipi ni ) zingsangin Leipi Tuiphum pawlmi Pa Kam Go Paute Kawlpi Lansone ah a teen lai-un a inn uh kangtum ngei hi. Amau inn bek hi lo a veengte (U Bo Lay) te inn zong kangtum hi. Ahi zong Pasian kammal kigelhna Lai Siangtho pen kang lo hi, cih a tanu Lia Cing Sian Lun in gen hi.
Pasian’ nasemte adingin IPad, Cellphone, Tablet cihte pen neih ding a hoih le a kisam mahmah hi a, mipi tawh a kizomte ahih manun hong zatsiam ding uh lunggulhhuai mahmah hi. Ahang in a nungta Pasian’ thu a gen Pastorste leVakkawn Siate pen Zomite adingin mi thupi mahmahte sungah kihel uh a, iPad le Cellphone pan Lai Siangtho hong sim manun mi’n hong gensiatsak ding zong i phal kei hi. Tua ahih manin tuhun adingin khuahun zui-in deih hunhun a kingah thei Lai Siangtho, mi cidam khat adingin zong puak lah ahi lo Lai Siangtho a bu mah tawh Pasian’ nasemten a gen ding thu kigingsain Pulpit, mipi mai pan hong sim ding uh laigelhpa ngaihsutna ahi hi.
Source:Zangkongawging Feb/2019